اقمولا وبلىسىنىڭ ۆەتەريناريا سالاسى زامان تالابىنا ساي تسيفرلاندىرۋ باعىتىن قولعا الدى. بۇگىندە وڭىردە VetLab, رپو، پروتسەسسينگ ورتالىق، ۆسە، ISZH-mobil, TortTulik سىندى التى جاڭا مودۋل پيلوتتىق رەجيمدە جۇمىس ىستەپ جاتىر. بۇل جۇيەلەر ۆەتەريناريالىق پروتسەستەردى جەڭىلدەتىپ، مامانداردىڭ جۇمىسىن جەدەل ءارى ءتيىمدى ەتۋگە مۇمكىندىك بەرەدى.بۇل تۋرالى اقمولا وبلىسى ۆەتەريناريا باسقارماسى باسشىسىنىڭ مىندەتىن اتقارۋشى اعىباي سىزدىقوۆ بريفينگتە ءمالىم ەتتى، دەپ حابارلايدى وڭىرلىك كوممۋنيكاتسيالار قىزمەتىنەن.
سوڭعى ءۇش جىلدا ۆەتەرينارلاردىڭ جالاقىسى ەكى ەسە ءوسىپ، جاس مامانداردىڭ كەلۋىنە جول اشىلدى. دەگەنمەن اۋىلدىق جەرلەردە كادر تاپشىلىعى بار. ايماقتا ۆەتەريناريالىق ماماندارمەن قامتىلۋ دەڭگەيى 77% قۇرايدى. كەيبىر اۋدانداردا بۇل كورسەتكىش 29%-عا دەيىن تومەندەگەن. وسى ماسەلەنى شەشۋ ءۇشىن قاتاركول كوللەدجى ماماندار دايارلاۋدى كۇشەيتىپ، 14 مامىردا بوس ورىندار جارمەڭكەسىن وتكىزۋدى جوسپارلاپ وتىر.
«ۆەتەريناريانى تسيفرلاندىرۋ اۋىل شارۋاشىلىعى ونىمدەرىنىڭ ەكسپورتتىق الەۋەتىن ارتتىرۋعا دا وڭ اسەرىن تيگىزۋدە. ايماقتا برۋتسەللەزگە قارسى كۇرەس كۇشەيتىلىپ، 2024 جىلى تەك ءبىر عانا وشاق تىركەلگەن. بۇل كورسەتكىش وتكەن جىلمەن سالىستىرعاندا بىرنەشە ەسە تومەن»، - دەيدى سپيكەر.
2025 جىلعا وبلىستىق بيۋدجەتتەن 4,3 ملرد تەڭگە ءبولىنىپ، مال اۋرۋلارىن انىقتاۋ، ۆاكتسيناتسيالاۋ، جانۋارلاردى سايكەستەندىرۋ جانە قاڭعىباس يت-مىسىقتاردى باقىلاۋ شارالارى جالعاسپاق. سونىمەن قاتار، 3 ءموبيلدى ينسينەراتور، 20 قىزمەتتىك اۆتوكولىك، 236 پلانشەت پەن 25 كومپيۋتەر ساتىپ الۋ جوسپارلانعان.
بۇگىندە ۆەتەريناريالىق قاۋىپسىزدىك تەك مال شارۋاشىلىعى ءۇشىن عانا ەمەس، ادامداردىڭ دەنساۋلىعى ءۇشىن دە ماڭىزدى. سەبەبى، دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سۇيەنسەك، جاڭا ينفەكتسيالىق اۋرۋلاردىڭ 70%-ى ادامعا جانۋارلاردان جۇعادى. سوندىقتان اقمولا وبلىسىنىڭ ۆەتەريناريالىق باسقارماسى حالىقارالىق ساراپشىلارمەن بىرلەسە وتىرىپ، اۋرۋلاردىڭ الدىن الۋ شارالارىن جەتىلدىرۋدە.
«اقمولا وبلىسىنىڭ ۆەتەريناريا باسقارماسى وڭىردەگى ەپيزووتيكالىق تۇراقتىلىقتى ساقتاۋ جانە ۆەتەريناريالىق قىزمەتتىڭ ساپاسىن ارتتىرۋ باعىتىندا جۇيەلى تۇردە جۇمىس جۇرگىزۋدە. ۆەتەريناريا سالاسىنداعى جاڭاشىلدىقتار اۋىل شارۋاشىلىعىنىڭ دامۋىنا وڭ اسەرىن تيگىزىپ، تۇرعىندار ءۇشىن قاۋىپسىز ازىق-تۇلىك ونىمدەرىن وندىرۋگە مۇمكىندىك بەرەدى»، - دەپ تۇيىندەدى اعىباي سىزدىقوۆ.
