28 ناۋرىز ساعات 03:42-دە قازاقستاننىڭ بىرنەشە ايماعىندا جەر سىلكىندى، دەپ حابارلايدى “ادىرنا” ۇلتتىق پورتالى.
سەيسميكالىق ستانتسيالار جەلىسى 28 ناۋرىزدا ساعات 03:42-دە جەر سىلكىنىسىن تىركەدى. جەر سىلكىنىسىنىڭ وشاعى الماتىدان وڭتۇستىك-باتىسقا قاراي 323 شاقىرىم جەردە ورنالاسقان. ول بىرنەشە ايماقتا سەزىلىپتى:
- مەركى – 5 بالل;
- قۇلان – 4 بالل;
- شۋ – 2 بالل;
- تولە بي – 2 بالل;
- سارىكەمەر – 2 بالل;
- تاراز قالاسى – 2 بالل;
- قورداي – 2 بالل;
- اسا – 2 بالل;
- مويىنقۇم – 2 بالل;
قيراندىلار، دۇمپۋدەن زارداپ شەككەندەر تۋرالى اقپارات تۇسكەن جوق. بارلىق قالىپتى جۇمىس ىستەپ تۇر.
توتەنشە جاعدايلار مينيسترلىگىنىڭ باسقارۋ ورتالىعىندا سەيسميكالىق جاعدايدى باقىلاۋ بويىنشا جەدەل شتاب قۇرىلدى.
توتەنشە جاعدايلار ۆيتسە-ءمينيسترى باتىربەك ابدىشەۆتىڭ توراعالىعىمەن اۋماقتىق بولىمشەلەرمەن جۇمىس كەڭەسى جانە ۆيدەوكونفەرەنتسيا ءوتتى.
“توتەنشە جاعدايلار مينيسترلىگى جاعدايدى باقىلاپ جاتىر. جاعداي تۇراقتى. قۇتقارۋ بولىمشەلەرى قاجەت بولعان جاعدايدا ارەكەت ەتۋ ءۇشىن دايىن. جامبىل وبلىسىندا حيميالىق قاۋىپتى 5 نىسان بار. ماماندار ولاردى تەكسەردى، قاۋىپ جوق”، – دەپ تولىقتىردى تجم.
