قازاقستان قارجىگەرلەر قاۋىمداستىعىنىڭ مالىمەتىنشە، ەلىمىزدىڭ رەسەيدەن يمپورتقا تاۋەلدىلىگى كۇشەيە تۇسكەن، دەپ حابارلايدى "ادىرنا" ۇلتتىق پورتالى.
«قازاقستان مەن رەسەي اراسىنداعى تاۋار اينالىمى 2024 جىلى وتكەن جىلدىڭ سايكەس كەزەڭىمەن سالىستىرعاندا 3%-عا ءوسىپ، 27,8 ملرد دوللارعا جەتتى. بۇل نەگىزىنەن يمپورتتىڭ 8%-عا ارتۋى ەسەبىنەن بولدى، ال قازاقستاننان رەسەيگە ەكسپورت 6%-عا تومەندەدى. يمپورتتىڭ ءوسۋى مەن ەكسپورتتىڭ قىسقارۋى اراسىنداعى قۇرىلىمدىق تەڭگەرىمسىزدىك قازاقستاندىق تاۋارلاردىڭ باسەكەگە قابىلەتتىلىگىنىڭ تومەندەۋىنە جانە رەسەي يمپورتىنا تاۋەلدىلىكتىڭ ارتۋىنا الىپ كەلۋى مۇمكىن»، – دەلىنگەن سارسەنبى كۇنى جاريالانعان حابارلامادا.
2024 جىلى رەسەيدىڭ قازاقستاننىڭ جالپى تاۋار اينالىمىنداعى ۇلەسى 20%-عا دەيىن ۇلعايدى (2023 جىلى – 19%). يمپورتتاعى ۇلەسى 28%-دان 31%-عا دەيىن ارتسا، ەكسپورتتاعى ۇلەسى 13%-دان 12%-عا تومەندەگەن.
قازاقستاننان رەسەيگە ەكسپورتتالاتىن حيميا ونىمدەرىنىڭ (+189 ملن دوللار) جانە مەتالداردىڭ (+47 ملن دوللار) ۇلەسى ارتقانىمەن، ماشينا جاساۋ (-629 ملن دوللار) جانە مينەرالدىق ونىمدەر (-370 ملن دوللار) كولەمى قىسقارعان. بۇل رەسەي تاراپىنان قازاقستاندىق شيكىزاتتىق تاۋارلارعا سۇرانىستىڭ وسكەنىن كورسەتەدى.
2024 جىلى قازاقستانعا رەسەيدەن توقىما بۇيىمدارى (+364 ملن دوللار), باعالى مەتالدار (+390 ملن دوللار) جانە حيميا ونىمدەرى (+334 ملن دوللار) كوپتەپ اكەلىنگەن. سونىمەن قاتار، ازىق-تۇلىك (+129 ملن دوللار), ازىق-تۇلىككە جاتپايتىن تاۋارلار (+505 ملن دوللار) جانە وندىرىستىك تاۋارلار (+929 ملن دوللار) يمپورتى دا ارتقان.
رەسەيمەن ساۋداداعى تەرىس بالانس 2023 جىلى 6,6 ملرد دوللار بولسا، 2024 جىلى 8,7 ملرد دوللارعا دەيىن ۇلعايعان. بۇل قازاقستاننىڭ تولەم بالانسىنا قوسىمشا قىسىم تۇسىرگەن.
ساۋدا كولەمىنىڭ ارتۋىنا بايلانىستى ءرۋبلدىڭ تولەم جۇيەسىندەگى ۇلەسى ءوستى. 2024 جىلدىڭ العاشقى توعىز ايىندا ەكسپورت بويىنشا تولەمدەردىڭ 77%-ى، ال يمپورت بويىنشا 96%-ى رۋبلمەن جۇرگىزىلگەن.
ققق ساراپشىلارىنىڭ ايتۋىنشا، رەسەيدەن يمپورتتىڭ كوبەيۋى قازاقستاننىڭ ىشكى ءوندىرىسىنىڭ جەتكىلىكسىزدىگىن كورسەتەدى. كەيبىر يمپورتتىق تاۋارلاردى (اۆتوكولىك بولشەكتەرى، مۇناي ونىمدەرى، كيىم، ءدارى-دارمەك، ازىق-تۇلىك ونىمدەرى) جەرگىلىكتى ءوندىرىس ارقىلى الماستىرۋ ءۇشىن مەملەكەتتىك باعدارلامالار قاجەت.
ساراپشىلاردىڭ پىكىرىنشە، رەسەيدەن يمپورتتىڭ ارتۋى تەڭگە مەن ءرۋبلدىڭ ءوزارا بايلانىسىن كۇشەيتىپ، ينفلياتسيا مەن ۆاليۋتا نارىعىنا قىسىم جاسايدى. ەگەر ساۋدا تەڭگەرىمىن رەتتەۋ شارالارى قابىلدانباسا، بۇل ءۇردىس جالعاسۋى مۇمكىن.
