قر ءسىم اقپاراتى بويىنشا، تۇركيادا جۇرگەن قازاقستاندىقتار ازىرگە كونسۋلدىق كومەككە جۇگىنگەن جوق، دەپ حابارلايدى "ادىرنا" ۇلتتىق پورتالى.
قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين ماجىلىستە وتكەن بريفينگتە قازاقستاندىقتارعا تۇركياعا ساپارلاردى كەيىنگە قالدىرۋعا كەڭەس بەردى.
راحمەتۋلليننىڭ ايتۋىنشا، قر ءسىم جانە قازاقستاننىڭ تۇركياداعى ءىرى قالالارداعى باس كونسۋلدىقتارى ازاماتتارمەن بەلسەندى جۇمىس ىستەپ، ولاردىڭ جاپپاي جينالاتىن جەرلەر مەن نارازىلىق اكتسيالارىنا بارماۋىن قامتاماسىز ەتۋگە تىرىسۋدا.
"ارينە، ساقتىق شارالارى قاجەت. بىراق ءدال قازىر مۇلدە بارۋعا بولمايدى دەپ ايتا المايمىن. ەگەر، مينيسترلىك اتىنان ەمەس، ءوزىم تۋرالى ايتسام، مەن كۇتەر ەدىم", – دەدى شەنەۋنىك.
جۋرناليستەردىڭ قازىرگى ۋاقىتتا ىستامبۇلعا بارۋ مۇمكىندىگى تۋرالى سۇراعىنا راحمەتۋللين "قاجەتسىز" دەپ جاۋاپ بەردى.
مينيسترلىك مالىمەتىنشە، تۇركيادا جۇرگەن قازاقستاندىقتار ازىرگە كونسۋلدىق كومەك سۇراماعان.
ەسكە سالا كەتەيىك، 19 ناۋرىز كۇنى ىستامبۇل مەرى ەكرەم يماموعلۋنا سىبايلاس جەمقورلىق ايىبى تاعىلىپ، ول قىزمەتىنەن شەتتەتىلدى. وسىدان كەيىن جاپپاي نارازىلىق شەرۋلەرى باستالدى. بەس كۇن ىشىندە 1133 ادام ۇستالىپ، 123 پوليتسيا قىزمەتكەرى جاراقات الدى.
