ءماجىلىس اقش-قا الماتىدان جەر تەلىمىن جالعا بەرۋدى ماقۇلدادى، دەپ حابارلايدى "ادىرنا" ۇلتتىق پورتالى قازتاگ-قا سىلتەپ
"قازاقستان رەسپۋبليكاسىنىڭ ۇكىمەتى مەن امەريكا قۇراما شتاتتارىنىڭ ۇكىمەتى اراسىنداعى الماتى قالاسىندا اقش-تىڭ كونسۋلدىق مەكەمەسىنىڭ عيماراتىن سالۋ ءۇشىن جەر تەلىمىن جالعا بەرۋ تۋرالى كەلىسىمگە" 2024 جىلعى 27 قىركۇيەكتە نيۋ-يورك قالاسىندا قول قويىلعان. بۇل كەلىسىم اقش ۇكىمەتىنە الماتى قالاسىندا كونسۋلدىق مەكەمە عيماراتىن سالۋ جانە پايدالانۋ ءۇشىن جالپى اۋدانى 70 593 شارشى مەتر (7,05 گەكتار) جەر تەلىمىن 49 جىل مەرزىمگە جالعا بەرۋ ماقساتىندا جاسالعان", – دەلىنگەن ءماجىلىستىڭ راتيفيكاتسيالىق زاڭ جوباسىنا بەرگەن قورىتىندىسىندا.
كەلىسىم اياسىندا جەر تەلىمىن بەرۋ ءتارتىبى مەن شارتتارى انىقتالعان.
"كەلىسىمنىڭ 1-بابىنىڭ 1.4-تارماعىنا سايكەس، كورسەتىلگەن جالداۋ مەرزىمى مەن كەيىنگى ۇزارتۋ كەزەڭدەرىندەگى جالداۋ اقىسى $25 301 016 قۇرايدى جانە كەلىسىم كۇشىنە ەنگەن كۇننەن باستاپ 30 كۇن ىشىندە ءبىر رەتتىك تولەم رەتىندە تولەنەدى. سونداي-اق، 3-باپقا سايكەس، اقش ۇكىمەتى جەر تەلىمى مەن كونسۋلدىق عيماراتقا قاتىستى كەز كەلگەن سالىقتار مەن تولەمدەردەن بوساتىلادى، تەك جالداۋ اقىسىن تولەۋ مىندەتى عانا قاراستىرىلعان", – دەلىنگەن قورىتىندىدا.
سونىمەن قاتار، 6-باپ بويىنشا اقش ۇكىمەتى كونسۋلدىق عيماراتتى سالۋ، ونى كۇتىپ-ۇستاۋ، جوندەۋ، بايلانىس قىزمەتتەرى، ەلەكتر، گاز، سۋ جانە جىلۋمەن جابدىقتاۋ سياقتى كوممۋنالدىق قىزمەتتەرگە جۇمسالاتىن بارلىق شىعىنداردى ءوز ەسەبىنەن وتەيدى.
"9-باپقا سايكەس، اقش تاراپى باس مەردىگەر رەتىندە امەريكالىق كومپانيانى تاڭدايدى. بۇل كومپانيا كونسۋلدىق عيماراتىن سالۋ جانە جابدىقتاۋ ءۇشىن اقش-تا وندىرىلگەن ماتەريالدار مەن تاۋارلاردى پايدالانا الادى. سونداي-اق، كونسۋلدىق عيماراتتى جابدىقتاۋعا جانە جيھازبەن قامتاماسىز ەتۋگە ارنالعان بارلىق ماتەريالدار، قۇرال-جابدىقتار مەن تاۋارلار كەدەندىك باجداردان، يمپورت سالىعىنان جانە رۇقسات الۋعا قاتىستى تالاپتاردان بوساتىلادى. كەلىسىمدى راتيفيكاتسيالاۋ قازاقستان مەن اقش اراسىنداعى قارىم-قاتىناستاردى ودان ءارى نىعايتۋعا جانە كەڭەيتۋگە ىقپال ەتەدى", – دەپ مالىمدەدى ءماجىلىستىڭ تومەنگى پالاتاسىندا.
ءماجىلىس كوميتەتتەرى كەلىسىمدى وڭ باعالاپ، ونى راتيفيكاتسيالاۋدى ۇسىندى.
"بۇۇ-نىڭ 74-سەسسياسىنا قاتىسقاننان كەيىن مەملەكەت باسشىسى اقش-تىڭ الماتىدا كونسۋلدىق عيماراتىن اشۋ تۋرالى تاپسىرما بەرگەن بولاتىن. وسى تاپسىرمانى ورىنداۋ ماقساتىندا 2024 جىلعى 27 قىركۇيەكتە نيۋ-يوركتە اقش-قا جەر تەلىمىن جالعا بەرۋ جونىندە كەلىسىمگە قول قويىلدى. قۇجاتقا سايكەس، جاماكاەۆ، الدار كوسە كوشەلەرى مەن ءال-فارابي، سەيفۋللين داڭعىلدارىنىڭ اراسىنداعى 70 593 شارشى مەتر اۋماق 49 جىل مەرزىمگە جالعا بەرىلەدى. كەلىسىم كۇشىنە ەنگەننەن كەيىن اقش جالداۋ اقىسىن ءبىر رەتتىك تولەم رەتىندە تولەيدى. بۇل كەلىسىم قازاقستان مەن اقش اراسىنداعى ستراتەگيالىق ارىپتەستىكتى نىعايتادى", – دەدى ماجىلىستە قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى.
