كوكشەتاۋدا ناۋرىز كۇنى قالا كوشەلەرىن 1600-دەن استام ايەل ۇلتتىق باس كيىمدەرى – كيمەشەكپەن كوركەمدەپ، مەرەكەلىك شەرۋ ۇيىمداستىردى. قاز قاتار تىزىلگەن كيمەشەكتەر شەرۋى تاريحي وقيعاعا اينالىپ، قازاقستان رەكوردتار كىتابىنا ەندى.
كيمەشەك قازاق حالقىندا ايەلدەردىڭ قادىر-قاسيەتىن، كوركى مەن دانالىعىن بىلدىرەتىن كيىم بولىپ تابىلادى. اقمولا وبلىسىنىڭ انالار كەڭەسى ۇيىمداستىرعان بۇل شارا ناۋرىز مەيرامىنىڭ ءسانىن ارتتىرىپ قانا قويماي، سونىمەن قاتار وبلىس تاريحىندا ماڭىزدى وقيعا رەتىندە ەستە قالدى. شەرۋ سالتانات سارايى الدىندا باستالىپ، بارلىق قاتىسۋشىلاردىڭ ەسەپكە الىنۋى قاتاڭ تۇردە جۇزەگە اسىرىلدى. ايەلدەر ءبىر شاقىرىمدىق قاشىقتىقتى اياقتاپ، ناتيجەنى تەك پارادتىڭ سوڭىندا عانا ءبىلدى. شاراعا قالا تۇرعىندارى عانا ەمەس، ونلاين كورەرمەندەر دە كۋا بولدى. شەرۋدىڭ تىكەلەي ترانسلياتسياسى جەرگىلىكتى تەلەارنا ارقىلى كورسەتىلىپ، ابىلاي حان الاڭىنداعى باستى ساحنادا LED ەكراندار ارقىلى دا كورسەتىلدى. وسىلايشا مىڭداعان كورەرمەن بۇل كورىنىستىڭ كۋاسى بولدى.
كيمەشەكتەر شەرۋىن مادەنيەت، ءبىلىم جانە قوعامدىق ومىردە وزىندىك ورنى بار ايەلدەر باستاپ شىقتى. ولاردىڭ اراسىندا قازاقستاننىڭ حالىق ءارتىسى جىبەك باعىسوۆا، مادەنيەت سالاسىنىڭ ەڭبەك سىڭىرگەن قايراتكەرلەرى بيسارا ماكەنوۆا مەن ورىنتاي ءجۇسىبالينا، ۇستاز جانە پۋبليتسيست ءاليا احەتوۆا، ءتىلشى مارال جاقىپوۆا، حالىق شىعارماشىلىعىنىڭ شەبەرلەرى ۇلجالعاس قارىمساقوۆا مەن گۇلنار ورىنباەۆا، سونداي-اق بەلسەندى ايەلدەر ۇيىمدارىنىڭ جەتەكشىلەرى اينۇر جاحينا مەن انارگۇل مۇحامەدراحيموۆا بار. بۇل ايەلدەر قازاق ايەلىنىڭ ءداستۇرىن، رۋحىن جانە سۇلۋلىعىن ۇلگى ەتتى.
پارادقا ءارتۇرلى جاس پەن ماماندىقتاعى ايەلدەر قاتىستى. ولار كوپبالالى انالار، ۇستازدار، دارىگەرلەر، ارتىستەر، جۇمىسشى ماماندىقتارى وكىلدەرى، سونداي-اق استانا مەن سولتۇستىك قازاقستان وبلىسىنان كەلگەن قوناقتار جانە اقمولا وبلىسىنىڭ اۋداندارىنان كەلگەن تۇرعىندار دا بار. سونىمەن قاتار، باسقا ۇلت وكىلدەرىنىڭ دە قاتىسۋى كيمەشەكتىڭ تەك قازاقتىڭ ۇلتتىق كيىمى عانا ەمەس، بۇكىل ەلدىڭ مادەنيەتى مەن داستۇرىنە دەگەن قۇرمەتتىڭ بەلگىسى ەكەنىن كورسەتتى.
اقمولا وبلىسىنىڭ اكىمى مارات احمەتجانوۆ شارانىڭ ماڭىزدى ەكەنىن اتاپ ءوتىپ، كيمەشەكتەر قازاق حالقىنىڭ تاريحى مەن مادەنيەتىنىڭ باي مۇراسى ەكەنىن جەتكىزدى.
«بۇل ۇلتتىق كيىمدەر بابالارىمىزدان قالعان اسىل مۇرا، ءبىزدىڭ حالىقتىڭ رۋحاني قازىناسىن جانە وزىندىك ەرەكشەلىگىن انىقتايتىن كيىمدەر. بۇل پارادقا دايىندىق بارىسىندا 20 شەبەرلىك ساباعى وتكىزىلدى. زەرەندىلىق جانە ءبىرجان سال اۋداندارىنىڭ 300-دەن استام قولونەرشىلەرى وسى كيىمدەردى تىگۋ ءۇشىن كۇنى-ءتۇنى ەڭبەك ەتتى. 500 كيمەشەك دايىندالىپ، اربىرەۋى شەبەرلەردىڭ قولىنان شىققان ناعىز ونەر تۋىندىسىنا اينالدى»، - دەپ اتاپ ءوتتى وبلىس اكىمى.
قازاقستان رەكوردتار كىتابىنىڭ وكىلى باقىتجان تاستۋلەكوۆ پارادتىڭ ەرەكشە ەكەنىن اتاپ ءوتىپ، بۇل وقيعانى قازاقستان رەكوردتار كىتابىنا تىركەگەنىن جاريالادى.
«بۇل راسىمدە اق كيمەشەكتىڭ شەرۋى ءوتتى. بۇرىن - سوڭدى وسىنداي پاراد بولماعان. 1600 ايەل قاتىسىپ، بۇل وقيعا قازاقستان رەكوردتار كىتابىنا ەندى!» – دەدى باقىتجان تاستۇلەكوۆ.
شارانىڭ سوڭىندا مارات احمەتجانوۆقا رەسمي سەرتيفيكات تاپسىرىلدى. كوكشەتاۋداعى كيمەشەك پارادى تەك اسەم كورىنىس عانا ەمەس، سونىمەن قاتار ۇرپاقتار ساباقتاستىعىنىڭ، اناعا دەگەن قۇرمەتتىڭ جانە حالىقتىق داستۇرلەرگە دەگەن سۇيىسپەنشىلىكتىڭ بەلگىسىنە اينالدى. بۇل وقيعا ايەلدەردىڭ بىرىگۋى، ىنتىماقتاستىعى مەن كۇش-جىگەرىنىڭ قانداي زور قۋاتقا يە ەكەنىن كورسەتىپ، بۇكىل قالا ءۇشىن ۇلكەن رۋحاني اسەر قالدىردى.
