Kókshetaýda naýryz kúni qala kóshelerin 1600-den astam áıel ulttyq bas kıimderi – kımeshekpen kórkemdep, merekelik sherý uıymdastyrdy. Qaz qatar tizilgen kımeshekter sherýi tarıhı oqıǵaǵa aınalyp, Qazaqstan Rekordtar kitabyna endi.
Kımeshek qazaq halqynda áıelderdiń qadir-qasıetin, kórki men danalyǵyn bildiretin kıim bolyp tabylady. Aqmola oblysynyń analar keńesi uıymdastyrǵan bul shara Naýryz meıramynyń sánin arttyryp qana qoımaı, sonymen qatar oblys tarıhynda mańyzdy oqıǵa retinde este qaldy. Sherý Saltanat saraıy aldynda bastalyp, barlyq qatysýshylardyń esepke alynýy qatań túrde júzege asyryldy. Áıelder bir shaqyrymdyq qashyqtyqty aıaqtap, nátıjeni tek paradtyń sońynda ǵana bildi. Sharaǵa qala turǵyndary ǵana emes, onlaın kórermender de kýá boldy. Sherýdiń tikeleı translıaııasy jergilikti telearna arqyly kórsetilip, Abylaı han alańyndaǵy basty sahnada LED ekrandar arqyly da kórsetildi. Osylaısha myńdaǵan kórermen bul kórinistiń kýási boldy.
Kımeshekter sherýin mádenıet, bilim jáne qoǵamdyq ómirde ózindik orny bar áıelder bastap shyqty. Olardyń arasynda Qazaqstannyń halyq ártisi Jibek Baǵysova, mádenıet salasynyń eńbek sińirgen qaıratkerleri Bısara Mákenova men Oryntaı Júsibalına, ustaz jáne pýblııst Álııa Ahetova, tilshi Maral Jaqypova, halyq shyǵarmashylyǵynyń sheberleri Uljalǵas Qarymsaqova men Gúlnar Orynbaeva, sondaı-aq belsendi áıelder uıymdarynyń jetekshileri Aınur Jahına men Anargúl Muhamedrahımova bar. Bul áıelder qazaq áıeliniń dástúrin, rýhyn jáne sulýlyǵyn úlgi etti.
Paradqa ártúrli jas pen mamandyqtaǵy áıelder qatysty. Olar kópbalaly analar, ustazdar, dárigerler, ártister, jumysshy mamandyqtary ókilderi, sondaı-aq Astana men Soltústik Qazaqstan oblysynan kelgen qonaqtar jáne Aqmola oblysynyń aýdandarynan kelgen turǵyndar da bar. Sonymen qatar, basqa ult ókilderiniń de qatysýy kımeshektiń tek qazaqtyń ulttyq kıimi ǵana emes, búkil eldiń mádenıeti men dástúrine degen qurmettiń belgisi ekenin kórsetti.
Aqmola oblysynyń ákimi Marat Ahmetjanov sharanyń mańyzdy ekenin atap ótip, kımeshekter qazaq halqynyń tarıhy men mádenıetiniń baı murasy ekenin jetkizdi.
«Bul ulttyq kıimder babalarymyzdan qalǵan asyl mura, bizdiń halyqtyń rýhanı qazynasyn jáne ózindik ereksheligin anyqtaıtyn kıimder. Bul paradqa daıyndyq barysynda 20 sheberlik sabaǵy ótkizildi. Zerendiliq jáne Birjan sal aýdandarynyń 300-den astam qolónershileri osy kıimderdi tigý úshin kúni-túni eńbek etti. 500 kımeshek daıyndalyp, árbireýi sheberlerdiń qolynan shyqqan naǵyz óner týyndysyna aınaldy», - dep atap ótti oblys ákimi.
Qazaqstan Rekordtar kitabynyń ókili Baqytjan Tastýlekov paradtyń erekshe ekenin atap ótip, bul oqıǵany Qazaqstan Rekordtar kitabyna tirkegenin jarııalady.
«Bul rásimde aq kımeshektiń sherýi ótti. Buryn - sońdy osyndaı parad bolmaǵan. 1600 áıel qatysyp, bul oqıǵa Qazaqstan Rekordtar kitabyna endi!» – dedi Baqytjan Tastúlekov.
Sharanyń sońynda Marat Ahmetjanovqa resmı sertıfıkat tapsyryldy. Kókshetaýdaǵy kımeshek parady tek ásem kórinis ǵana emes, sonymen qatar urpaqtar sabaqtastyǵynyń, anaǵa degen qurmettiń jáne halyqtyq dástúrlerge degen súıispenshiliktiń belgisine aınaldy. Bul oqıǵa áıelderdiń birigýi, yntymaqtastyǵy men kúsh-jigeriniń qandaı zor qýatqa ıe ekenin kórsetip, búkil qala úshin úlken rýhanı áser qaldyrdy.
