تۇركيا پرەزيدەنتى رەجەپ تايىپ ەردوعان ەلدە ءوتىپ جاتقان جاپپاي نارازىلىق اكتسيالارىنا بايلانىستى مالىمدەمە جاساپ، بيلىك "كوشەدەگى تەررورعا" توزە المايتىنىن جەتكىزدى، دەپ حابارلايدى "ادىرنا" ۇلتتىق پورتالى ريا نوۆوستي اگەنتتىگىنە سىلتەمە جاساپ.
"مارگينالدى توپتاردىڭ سوڭىنان ەرۋ، پوليتسياعا شابۋىل جاساۋ، سۋديالار مەن پروكۋرورلارعا قاۋىپ ءتوندىرۋ، دەموكراتيا مەن ۇلتتىق ەرىك-جىگەرگە قارسى تۇرۋ – بۇل ەل ءۇشىن ەشقانداي ناتيجە بەرمەيدى. تۇركيا كوشەدە تابىلعان مەملەكەت ەمەس. ءبىز كوشەدەگى تەررورعا باعىنبايمىز", – دەدى ەردوعان.
ونىڭ ايتۋىنشا، تۇركيا بيلىگى ەلدىڭ تۇراقتىلىعىنا قاۋىپ توندىرەتىن كەز كەلگەن ارەكەتكە جول بەرمەيدى.
19 ناۋرىزدا ستامبۋل پروكۋراتۋراسى قالانىڭ مەرى ەكرەم يماموعلۋ جەمقورلىق، پاراقورلىق جانە تەرروريستىك ۇيىمدارعا كومەكتەسۋ ءىسى بويىنشا تەرگەۋگە الىنعانىن حابارلادى. وپپوزيتسيا وكىلى يماموعلۋ بۇل ايىپتاردى جوققا شىعارىپ، بيلىكتىڭ قىسىمىنا قارسى تۇراتىنىن مالىمدەدى.
وسى وقيعادان كەيىن انكارا مەن ستامبۋلدا مىڭداعان ادام نارازىلىق شەرۋلەرىنە شىقتى. بيلىك قاۋىپسىزدىك شارالارىن كۇشەيتىپ، جەكسەنبىگە دەيىن كەز كەلگەن ميتينگ پەن دەمونستراتسيا وتكىزۋگە تىيىم سالدى.
تۇركيانىڭ ىشكى ىستەر ءمينيسترى ءالي ەرلىكايا نارازىلىقتار كەزىندە 16 پوليتسەيدىڭ جاراقات العانىن حابارلادى.
بۇل وقيعا ەردوعان مەن وپپوزيتسيا اراسىنداعى كۇرەستى ودان ءارى شيەلەنىستىرە ءتۇستى. يماموعلۋنى الداعى مەرزىمىنەن بۇرىن وتەتىن پرەزيدەنتتىك سايلاۋدا ەردوعاننىڭ باستى قارسىلاسى رەتىندە قاراستىراتىندار كوپ.
