ماكينسك قالاسىندا سۋ تاسقىنى ورىن الىپ، سونىڭ سالدارىنان قالاداعى ءبىر مەكتەپتە ساباقتار ۋاقىتشا توقتاتىلدى. الەۋمەتتىك جەلىلەردە سۋ تاسقىنى قاۋپى تۋرالى اقپارات تارالعان سوڭ، جەرگىلىكتى تۇرعىندار بيلىك وكىلدەرىنەن رەسمي تۇسىنىكتەمە كۇتتى.
№1 ورتا مەكتەپ اۋماعىندا سۋ اعاتىن درەناجدىق كاناۆا ورنالاسقان، ول جىل سايىن ەرىگەن قار مەن جاڭبىر سۋىنىڭ اعىنىن وتكىزۋ ءۇشىن قولدانىلادى. بۇل تابيعي پروتسەسس قالىپتى جاعداي بولىپ سانالادى جانە سۋ بۇرۋ جۇيەسىنىڭ ءبىر بولىگى بولىپ تابىلادى.
جەرگىلىكتى اتقارۋشى ورگاندار مەن توتەنشە جاعدايلار قىزمەتىنىڭ مالىمەتىنشە، كانال ارناسى ۋاقىتىلى تازارتىلعان، ال مەكتەپ عيماراتىن سۋ باسۋ قاۋپى جوق.
"قاۋىپسىزدىك ماقساتىندا ءبىرىنشى جانە ەكىنشى اۋىسىمداعى وقۋشىلاردى قاشىقتان وقىتۋ فورماتىنا اۋىستىرۋ تۋرالى شەشىم قابىلداندى. مەكتەپتە تاۋلىك بويى كەزەكشىلىك ۇيىمداستىرىلىپ، جاعداي جەرگىلىكتى بيلىكتىڭ باقىلاۋىندا تۇر", – دەپ حابارلادى اقمولا وبلىسىنىڭ ءبىلىم باسقارماسى.
ايتا كەتەيىك، اۋدان اۋماعىندا ماكينسك قالاسىن قوسا العاندا، سۋ تاسقىنى قاۋپى جوعارى 12 ەلدى مەكەن بار. سۋ تاسقىنى قاۋپىن ازايتۋعا باعىتتالعان كەشەندى ينجەنەرلىك قورعاۋ جوسپارى اياسىندا 23 الدىن الۋ شاراسى جۇزەگە اسىرىلدى.
"ماكينسك قالاسىندا ۇزىندىعى 6,6 كم ارىق جۇيەسى تازارتىلىپ، تەرەڭدەتىلدى، 2,3 كم ۇزىندىقتاعى قورعانىس بوگەتى سالىندى، سونداي-اق سۋ وتكىزۋ قۇبىرلارى ورناتىلدى. قالاداعى نەگىزگى كوشەلەردە ارىقتاردى تازارتۋ، جاعالاۋلاردى بەكىتۋ جانە درەناجدىق جۇيەلەردى جاقسارتۋ جۇمىستارى جۇرگىزىلدى", – دەپ مالىمدەدى بۇلاندى اۋدانى اكىمدىگى.
اۋداندا سۋ تاسقىنىنا قارسى شتاب قۇرىلىپ، جولدار قاردان تازارتىلدى، ارىقتاردى كۇتىپ-ۇستاۋ بويىنشا كەلىسىمشارتتار جاسالدى. ەگەر جاعداي ۋشىعا تۇسسە، زارداپ شەككەندەرگە ارنالعان ەۆاكۋاتسيالىق پۋنكتتەر دايىندالادى.
جەرگىلىكتى بيلىك جاعدايدىڭ تولىق باقىلاۋدا ەكەنىن جانە قابىلدانعان شارالاردىڭ سۋ تاسقىنىنىڭ سالدارىن بارىنشا ازايتۋعا كومەكتەسەتىنىن مالىمدەدى.
