Makınsk qalasynda sý tasqyny oryn alyp, sonyń saldarynan qaladaǵy bir mektepte sabaqtar ýaqytsha toqtatyldy. Áleýmettik jelilerde sý tasqyny qaýpi týraly aqparat taralǵan soń, jergilikti turǵyndar bılik ókilderinen resmı túsinikteme kútti.
№1 orta mektep aýmaǵynda sý aǵatyn drenajdyq kanava ornalasqan, ol jyl saıyn erigen qar men jańbyr sýynyń aǵynyn ótkizý úshin qoldanylady. Bul tabıǵı proess qalypty jaǵdaı bolyp sanalady jáne sý burý júıesiniń bir bóligi bolyp tabylady.
Jergilikti atqarýshy organdar men tótenshe jaǵdaılar qyzmetiniń málimetinshe, kanal arnasy ýaqytyly tazartylǵan, al mektep ǵımaratyn sý basý qaýpi joq.
"Qaýipsizdik maqsatynda birinshi jáne ekinshi aýysymdaǵy oqýshylardy qashyqtan oqytý formatyna aýystyrý týraly sheshim qabyldandy. Mektepte táýlik boıy kezekshilik uıymdastyrylyp, jaǵdaı jergilikti bıliktiń baqylaýynda tur", – dep habarlady Aqmola oblysynyń bilim basqarmasy.
Aıta keteıik, aýdan aýmaǵynda Makınsk qalasyn qosa alǵanda, sý tasqyny qaýpi joǵary 12 eldi meken bar. Sý tasqyny qaýpin azaıtýǵa baǵyttalǵan Keshendi ınjenerlik qorǵaý jospary aıasynda 23 aldyn alý sharasy júzege asyryldy.
"Makınsk qalasynda uzyndyǵy 6,6 km aryq júıesi tazartylyp, tereńdetildi, 2,3 km uzyndyqtaǵy qorǵanys bógeti salyndy, sondaı-aq sý ótkizý qubyrlary ornatyldy. Qaladaǵy negizgi kóshelerde aryqtardy tazartý, jaǵalaýlardy bekitý jáne drenajdyq júıelerdi jaqsartý jumystary júrgizildi", – dep málimdedi Bulandy aýdany ákimdigi.
Aýdanda sý tasqynyna qarsy shtab qurylyp, joldar qardan tazartyldy, aryqtardy kútip-ustaý boıynsha kelisimsharttar jasaldy. Eger jaǵdaı ýshyǵa tússe, zardap shekkenderge arnalǵan evakýaııalyq pýnktter daıyndalady.
Jergilikti bılik jaǵdaıdyń tolyq baqylaýda ekenin jáne qabyldanǵan sharalardyń sý tasqynynyń saldaryn barynsha azaıtýǵa kómektesetinin málimdedi.
