قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى دارحان قۇراقباەۆتىڭ مالىمدەۋىنشە، ارعىن نىعماتۋلين ەلدەن تەرگەۋ باستالماي تۇرىپ شىعىپ كەتكەن، دەپ حابارلايدى "ادىرنا" ۇلتتىق پورتالى.
قۇراقباەۆ بۇل تۋرالى سەنات وتىرىسىنىڭ كۋلۋارىندا ايتتى.
"انتيكور نىعماتۋلينگە قاتىستى تەرگەۋ جۇرگىزىپ جاتقان جوق. بۇل ءىستى باسقا مەملەكەتتىك ورگان تەرگەپ جاتىر، سوندىقتان ءبىز تۇسىنىكتەمە بەرە المايمىز. ءبىز تەك ىزدەستىرۋ شارالارىن جۇزەگە اسىرۋدامىز", — دەدى اگەنتتىك وكىلى.
جۋرناليستەر نىعماتۋليننىڭ قاي ەلدە ەكەنى انىقتالعانىن سۇراعاندا، قۇراقباەۆ ونىڭ قازاقستاننان الدەقاشان شىعىپ كەتكەنىن ايتتى.
ء"بىز ونىڭ ەلدە جوق ەكەنىن ناقتى بىلەمىز. ول تەرگەۋ باستالماي تۇرىپ كەتىپ قالعان. قازىرگى ۋاقىتتا ونى ىزدەستىرۋ جانە ەلگە قايتارۋ بويىنشا شارالار جۇرگىزىلۋدە. ول حالىقارالىق ىزدەۋگە جاريالانعان", — دەپ مالىمدەدى قۇراقباەۆ.
بۇعان دەيىن باس پروكۋراتۋرا ارعىن نىعماتۋلين مەن باسقا دا تۇلعالارعا قاتىستى قىلمىستىق كودەكستىڭ 189-بابى 4-بولىگىنىڭ 2-تارماعى ("سەنىپ تاپسىرىلعان بوتەن مۇلىكتى يەمدەنۋ نەمەسە تالان-تاراجعا سالۋ") بويىنشا تەرگەۋ جۇرگىزىلىپ جاتقانىن حابارلاعان بولاتىن. سوت نىعماتۋلينگە قاماۋعا الۋ تۇرىندەگى بۇلتارتپاۋ شاراسىن سانكتسيالاپ، ونى ىزدەۋگە جاريالادى.
اتالعان باپقا سايكەس، كىنالى تۇلعا 7 جىلدان 12 جىلعا دەيىن باس بوستاندىعىنان ايىرىلىپ، مۇلكى تاركىلەنۋى مۇمكىن. سونداي-اق، بەلگىلى ءبىر لاۋازىمداردى اتقارۋعا تىيىم سالىنادى.
قۇقىقتىق ستاتيستيكا ورگاندارىنىڭ سايتىندا نىعماتۋلينگە ىزدەۋ جاريالانعانى تۋرالى اقپارات بۇرىن دا جاريالانعان ەدى.
