Qazaqstan Respýblıkasy sybaılas jemqorlyqqa qarsy is-qımyl agenttigi tóraǵasynyń orynbasary Darhan Quraqbaevtyń málimdeýinshe, Arǵyn Nyǵmatýlın elden tergeý bastalmaı turyp shyǵyp ketken, dep habarlaıdy "Adyrna" ulttyq portaly.
Quraqbaev bul týraly Senat otyrysynyń kýlýarynda aıtty.
"Antıkor Nyǵmatýlınge qatysty tergeý júrgizip jatqan joq. Bul isti basqa memlekettik organ tergep jatyr, sondyqtan biz túsinikteme bere almaımyz. Biz tek izdestirý sharalaryn júzege asyrýdamyz", — dedi agenttik ókili.
Jýrnalıster Nyǵmatýlınniń qaı elde ekeni anyqtalǵanyn suraǵanda, Quraqbaev onyń Qazaqstannan áldeqashan shyǵyp ketkenin aıtty.
"Biz onyń elde joq ekenin naqty bilemiz. Ol tergeý bastalmaı turyp ketip qalǵan. Qazirgi ýaqytta ony izdestirý jáne elge qaıtarý boıynsha sharalar júrgizilýde. Ol halyqaralyq izdeýge jarııalanǵan", — dep málimdedi Quraqbaev.
Buǵan deıin Bas prokýratýra Arǵyn Nyǵmatýlın men basqa da tulǵalarǵa qatysty Qylmystyq kodekstiń 189-baby 4-bóliginiń 2-tarmaǵy ("Senip tapsyrylǵan bóten múlikti ıemdený nemese talan-tarajǵa salý") boıynsha tergeý júrgizilip jatqanyn habarlaǵan bolatyn. Sot Nyǵmatýlınge qamaýǵa alý túrindegi bultartpaý sharasyn sankııalap, ony izdeýge jarııalady.
Atalǵan bapqa sáıkes, kináli tulǵa 7 jyldan 12 jylǵa deıin bas bostandyǵynan aıyrylyp, múlki tárkilenýi múmkin. Sondaı-aq, belgili bir laýazymdardy atqarýǵa tyıym salynady.
Quqyqtyq statıstıka organdarynyń saıtynda Nyǵmatýlınge izdeý jarııalanǵany týraly aqparat buryn da jarııalanǵan edi.
