ناۋرىز مەرەكەسىن تويلاۋ اياسىندا كوكشەتاۋدا ۇلتتىق كيىمدەر كۇنىنە ارنالعان وبلىستىق «ءسان مەن سالتانات» فەستيۆالى ءوتتى. بۇل شارا قازاق حالقىنىڭ مادەني مۇراسىن ساقتاۋ، دارىپتەۋ جانە ۇلتتىق كيىمنىڭ اسەمدىگىن كورسەتۋ ماقساتىندا ۇيىمداستىرىلدى، دەپ حابارلايدى وڭىرلىك كوممۋنيكاتسيالار قىزمەتىنەن.
فەستيۆالگە اقمولا وبلىسىنىڭ ءار اۋدانىنان ديزاينەرلەر قاتىسىپ، ءوز جۇمىستارىن ۇسىندى. شارا اياسىندا ۇلتتىق كيىم ۇلگىلەرى تانىستىرىلىپ، ولاردىڭ تاريحى مەن سيمۆوليكالىق ماڭىزى جايلى ايتىلدى.
فەستيۆالگە قاتىسقان شەبەرلەردىڭ ايتۋىنشا، ۇلتتىق كيىم – جاي عانا ءسان ەمەس، ول حالقىمىزدىڭ تاريحى، مادەنيەتى مەن رۋحاني بولمىسىنىڭ ايناسى. ۇلتتىق كيىمدەردى تىگۋ ۇلكەن شىعارماشىلىق پەن تاباندىلىقتى تالاپ ەتەدى.
«ءبىز كوپ جىلدان بەرى ۇلتتىق كيىمدەردى تىگىپ، حالىققا ۇسىنىپ كەلەمىز. بۇل سالا تەرەڭ ءبىلىم مەن ۇلكەن شەبەرلىكتى قاجەت ەتەدى. ءار كويلەك قازاق قىزىنىڭ نازىكتىگىن، ەرەكشەلىگىن كورسەتەتىندەي ەتىپ جاسالادى»، – دەيدى كوكشەتاۋ قالاسىنداعى «سۆەتلانا» اتەلەسىنىڭ ديرەكتورى سۆەتلانا ەحلاكوۆا.
ديزاينەر اسەمگۇل وسپانوۆانىڭ ايتۋىنشا، بۇگىندە ۇلتتىق كيىمدەر تەك مەرەكەلەردە عانا ەمەس، كۇندەلىكتى ومىردە دە سانگە اينالىپ كەلەدى.
«ءبىزدىڭ توپتاماعا ءداستۇرلى ۇلگىلەرمەن قاتار، زاماناۋي سانگە ساي كيىمدەر دە ەنگىزىلگەن. ۇلتتىق كيىمدى دارىپتەۋ تەك ءسان ءۇردىسى عانا ەمەس، بۇل – ۇلتتىڭ رۋحاني بىرلىگىن نىعايتۋعا، ءتۇپ-تامىرىمىزعا دەگەن ماقتانىش سەزىمىن ارتتىرۋعا باعىتتالعان قۇندىلىق. قازاقستان پرەزيدەنتى قاسىم-جومارت توقاەۆ ۇلتتىق قۇرىلتايدا ۇلتتىق كيىم كيۋدىڭ سانگە اينالۋى كەرەكتىگىن اتاپ وتكەن بولاتىن»، – دەيدى ول.
فەستيۆال سوڭىندا بارلىق ديزاينەرلەرگە العىس حاتتار مەن ارنايى سىيلىقتار تابىستالدى. بۇل شارا ۇلتتىق مۇرانى ساقتاۋ مەن ونى بولاشاق ۇرپاققا جەتكىزۋدىڭ ماڭىزدىلىعىن تاعى ءبىر مارتە ايقىنداي ءتۇستى دەسەدى ۇيىمداستىرۋشىلار.
