Naýryz merekesin toılaý aıasynda Kókshetaýda ulttyq kıimder kúnine arnalǵan oblystyq «Sán men saltanat» festıvali ótti. Bul shara qazaq halqynyń mádenı murasyn saqtaý, dáripteý jáne ulttyq kıimniń ásemdigin kórsetý maqsatynda uıymdastyryldy, dep habarlaıdy Óńirlik kommýnıkaııalar qyzmetinen.
Festıvalge Aqmola oblysynyń ár aýdanynan dızaınerler qatysyp, óz jumystaryn usyndy. Shara aıasynda ulttyq kıim úlgileri tanystyrylyp, olardyń tarıhy men sımvolıkalyq mańyzy jaıly aıtyldy.
Festıvalge qatysqan sheberlerdiń aıtýynsha, ulttyq kıim – jaı ǵana sán emes, ol halqymyzdyń tarıhy, mádenıeti men rýhanı bolmysynyń aınasy. Ulttyq kıimderdi tigý úlken shyǵarmashylyq pen tabandylyqty talap etedi.
«Biz kóp jyldan beri ulttyq kıimderdi tigip, halyqqa usynyp kelemiz. Bul sala tereń bilim men úlken sheberlikti qajet etedi. Ár kóılek qazaq qyzynyń náziktigin, ereksheligin kórsetetindeı etip jasalady», – deıdi Kókshetaý qalasyndaǵy «Svetlana» atelesiniń dırektory Svetlana Ehlakova.
Dızaıner Ásemgúl Ospanovanyń aıtýynsha, búginde ulttyq kıimder tek merekelerde ǵana emes, kúndelikti ómirde de sánge aınalyp keledi.
«Bizdiń toptamaǵa dástúrli úlgilermen qatar, zamanaýı sánge saı kıimder de engizilgen. Ulttyq kıimdi dáripteý tek sán úrdisi ǵana emes, bul – ulttyń rýhanı birligin nyǵaıtýǵa, túp-tamyrymyzǵa degen maqtanysh sezimin arttyrýǵa baǵyttalǵan qundylyq. Qazaqstan Prezıdenti Qasym-Jomart Toqaev Ulttyq quryltaıda ulttyq kıim kııýdiń sánge aınalýy kerektigin atap ótken bolatyn», – deıdi ol.
Festıval sońynda barlyq dızaınerlerge alǵys hattar men arnaıy syılyqtar tabystaldy. Bul shara ulttyq murany saqtaý men ony bolashaq urpaqqa jetkizýdiń mańyzdylyǵyn taǵy bir márte aıqyndaı tústi desedi uıymdastyrýshylar.
