استاناداعى تۇرعىن ءۇي كەشەنىنىڭ ليفتىندە پىشاقپەن شابۋىل جاسالعان بەس جاسار بالانىڭ سول جاق بەتى قوزعالماي قالعان. بۇل تۋرالى Tengrinews.kz تىلشىسىنە اناسى ونىڭ قازىرگى جاعدايى تۋرالى ايتىپ بەردى، دەپ حابارلايدى “ادىرنا”.
اناسىنىڭ ايتۋىنشا، بالاعا جاراقاتتان كەيىنگى نەيروپاتيا دياگنوزى قويىلعان – بۇل بەت جۇيكەسىنىڭ زاقىمدانۋى، سونىڭ سالدارىنان ونىڭ سول جاق بەتى قوزعالماي قالعان. قازىر ول فيزيوتەراپيا كۋرسىنان ءوتىپ جاتىر، الايدا دارىگەرلەر ءالى ناقتى بولجام جاساي الماي وتىر.
"سول جاعى قوزعالمايدى. دارىگەرلەر قالپىنا كەلۋ پروتسەسى ءبىراز ۋاقىت الۋى مۇمكىن دەيدى. قوسىمشا وتا جاساۋ قاجەتتىلىگى تۋرالى ازىرگە ناقتى ەشكىم ەشتەڭە ايتا المايدى. ءبىر جىلدىڭ ىشىندە وڭالتۋ بارىسىندا بەلگىلى بولادى", – دەدى زارداپ شەككەن بالانىڭ اناسى.
مامانداردىڭ ايتۋىنشا، مۇنداي جاراقاتتار كەزىندە كوپ نارسە اعزانىڭ جەكە ەرەكشەلىكتەرى مەن رەابيليتاتسيانىڭ تيىمدىلىگىنە بايلانىستى. فيزيوتەراپيا جۇيكە مەن بۇلشىقەتتەردى ىنتالاندىرۋعا باعىتتالعان، الايدا قالپىنا كەلۋ پروتسەسى ۇزاققا سوزىلۋى مۇمكىن. دارىگەرلەر بالانىڭ جاعدايىن ۇنەمى باقىلاپ وتىر، بىراق ازىرگە وتا قاجەت پە، جوق پا دەگەن سۇراققا ناقتى جاۋاپ بەرە المايدى.
ەسكە سالايىق، 2025 جىلى 11 اقپاندا استانادا 14 جاستاعى ءجاسوسپىرىم ليفتىدە بالاعا پىشاقپەن شابۋىل جاساعان. وقيعانى تەرگەۋ كەزىندە كامەلەت جاسىنا تولماعان ءجاسوسپىرىم پسيحونەۆرولوگيالىق ديسپانسەردە ەسەپتە تۇرعانى انىقتالعان.
استانا پوليتسيا دەپارتامەنتى باستىعىنىڭ ورىنباسارى قۋانىش ورىنبەتوۆتىڭ ايتۋىنشا، بالاعا جاسالعان شابۋىل بويىنشا قىلمىستىق ءىس قوزعالعان.
قالالىق دەنساۋلىق ساقتاۋ باسقارماسىنىڭ مالىمەتىنشە، زارداپ شەككەن بالا بەس جاستا. وقيعادان كەيىن ول كوپسالالى №2 قالالىق بالالار اۋرۋحاناسىنىڭ جاق-بەت حيرۋرگياسى بولىمىنە جاتقىزىلعان.
دارىگەرلەر ونىڭ جالپى جاعدايىن اۋىر دەپ باعالادى. ال وتادان كەيىن بالانىڭ جاعدايى تۇراقتى ەكەنى ايتىلدى.
