اقش فەدەرالدى بيۋدجەتى ارقىلى قارجىلاندىرىلاتىن «امەريكا داۋىسى» راديوستانتسياسىنىڭ 1,3 مىڭنان استام قىزمەتكەرى اكىمشىلىك دەمالىسقا جىبەرىلدى. 83 جىلدىق تاريحىندا العاش رەت راديوستانتسيانىڭ حابار تاراتۋى توقتاتىلدى. بۇل تۋرالى رەداكتسيا ديرەكتورى مايكل ابراموۆيتس LinkedIn الەۋمەتتىك جەلىسىندە مالىمدەدى، دەپ حابارلايدى "ادىرنا" ۇلتتىق پورتالى.
«مەن قايعىرىپ وتىرمىن، سەبەبى 83 جىل ىشىندە العاش رەت اڭىزعا اينالعان «امەريكا داۋىسى» ءۇنسىز قالدى. بۇگىن تاڭەرتەڭ مەن راديوستانتسيانىڭ 1300-دەن استام جۋرناليستەرى، پروديۋسەرلەرى جانە تەحنيكالىق قىزمەتكەرلەرى سياقتى ءوزىمنىڭ دە اكىمشىلىك دەمالىسقا جىبەرىلگەنىمدى ءبىلدىم. «امەريكا داۋىسىنا» شىنايى رەفورمالار قاجەت، جانە بۇل باعىتتا بەلگىلى ءبىر جەتىستىكتەرگە قول جەتكىزىلگەن بولاتىن. الايدا بۇگىنگى شەشىم راديوستانتسيانىڭ ماڭىزدى ميسسياسىن ورىنداۋ مۇمكىندىگىنەن ايىرادى. بۇل ميسسيا اسىرەسە قازىر وتە ماڭىزدى، ويتكەنى يران، قىتاي جانە رەسەي سياقتى امەريكانىڭ قارسىلاستارى ميللياردتاعان دوللار جۇمساپ، اقش-تى قارالايتىن جالعان اقپارات تاراتۋدا»، – دەپ جازدى ابراموۆيتس.
ونىڭ ايتۋىنشا، ەگەر اگەنتتىك قانداي دا ءبىر فورمادا ساقتالىپ قالسا دا، اقش پرەزيدەنتى اكىمشىلىگىنىڭ بۇگىنگى ارەكەتتەرى ونىڭ ەركىن جانە قاۋىپسىز الەم قالىپتاستىرۋ قابىلەتىنە ۇلكەن زيان تيگىزەدى.
«80 جىلدان استام ۋاقىت بويى «امەريكا داۋىسى» اقش-تىڭ باعا جەتپەس بايلىعى بولىپ، كوممۋنيزمگە، فاشيزمگە جانە قىسىم كورسەتۋگە قارسى كۇرەستە ماڭىزدى ءرول اتقاردى. سونداي-اق بۇكىل الەمدە بوستاندىق پەن دەموكراتيانى قورعادى. بۇگىندە ونىڭ اۋديتورياسى اپتاسىنا 360 ميلليوننان اسا ادامدى قۇرايدى. 48 تىلدە حابار تاراتىلادى. ديكتاتۋرا جاعدايىندا ءومىر سۇرەتىن كوپتەگەن ادامدار ءۇشىن «امەريكا داۋىسى» جالعىز سەنىمدى اقپارات كوزى بولىپ قالا بەرەدى»، – دەپ اتاپ ءوتتى ول.
بۇعان دەيىن اقش پرەزيدەنتى دونالد ترامپ بيۋروكراتيامەن كۇرەسۋ ماقساتىندا بىرنەشە مەملەكەتتىك مەكەمە قىزمەتىن بارىنشا قىسقارتۋ تۋرالى جارلىققا قول قويعان بولاتىن. ونىڭ ىشىندە اقش-تىڭ عالامدىق مەديا اگەنتتىگى (USAGM) دە بار. ول «ازات ەۋروپا/ازاتتىق راديوسى» مەن «امەريكا داۋىسىن» باقىلايدى. سەنبى كۇنى ترامپ اكىمشىلىگى «ازاتتىق راديوسىنىڭ» بۇكىل جەلىسىن قارجىلاندىرۋدى توقتاتقانىن جاريالادى.
