قىرعىزستان ۇكىمەتى جالپى ءبىلىم بەرۋدىڭ جاڭا مەملەكەتتىك ستاندارتىن بەكىتتى. جاڭا جۇيە 2025 جىلدىڭ قىركۇيەك ايىنان باستاپ ەنگىزىلەدى، دەپ حابارلايدى "ادىرنا" ۇلتتىق پورتالى fergana.agency-گە سىلتەمە جاساپ.
بۇل رەفورما ءبىلىم ساپاسىن ارتتىرىپ، ۇلتتىق ءبىلىم بەرۋ جۇيەسىن حالىقارالىق دەڭگەيگە سايكەستەندىرۋدى كوزدەيدى.
جاڭا ستاندارت بويىنشا مەكتەپتەر 12 جىلدىق وقىتۋ جۇيەسىنە كوشەدى. وقۋ ۇدەرىسى ءۇش دەڭگەيگە بولىنەدى: باستاۋىش (1-6 سىنىپتار), نەگىزگى (7-9 سىنىپتار) جانە ورتا ءبىلىم بەرۋ (10-12 سىنىپتار). سونىمەن قاتار، وقۋشىلاردى باعالاۋ جۇيەسى وزگەرىپ، 1-3 سىنىپتاردا ءداستۇرلى باعا قويۋ الىنىپ تاستالادى، ال 4-سىنىپتان باستاپ باللدىق باعالاۋ جۇيەسى ەنگىزىلەدى. 7-12 سىنىپتاردا كريتەريالدى باعالاۋ ءادىسى قولدانىلىپ، وقۋشىلاردىڭ ءوزىن-ءوزى باعالاۋ داعدىلارىن دامىتۋعا باعىتتالادى.
جاڭارتىلعان جۇيەگە سايكەس، التى جاستاعى بالالار 1-سىنىپقا قابىلدانسا، جەتى جاستاعى بالالار بىردەن 2-سىنىپقا بارادى. 3-سىنىپتى اياقتاعان وقۋشىلار 5-سىنىپقا، ال 6-سىنىپتى اياقتاعاندار 8-سىنىپقا اۋىستىرىلادى. جاڭا ءبىلىم بەرۋ باعدارلاماسى بويىنشا العاشقى اتتەستاتتار 2027/2028 وقۋ جىلىندا بەرىلەدى، ال تولىققاندى 12 جىلدىق مەكتەپتىڭ العاشقى تۇلەكتەرى 2036/2037 وقۋ جىلىندا مەكتەپ بىتىرەدى.
قىرعىزستاننىڭ ءبىلىم ءمينيسترى دوگدۋركۇل كەنديرباەۆانىڭ ايتۋىنشا، 12 جىلدىق جۇيەگە كوشۋگە بايلانىستى باكالاۆرياتتىڭ وقۋ مەرزىمى 4 جىلدان 3 جىلعا قىسقارتىلادى، سەبەبى كەيبىر ۋنيۆەرسيتەتتىك باعدارلامالار مەكتەپتىڭ جوعارى سىنىپتارىندا وقىتىلاتىن بولادى.
