Qyrǧyzstan ükımetı jalpy bılım berudıŋ jaŋa memlekettık standartyn bekıttı. Jaŋa jüie 2025 jyldyŋ qyrküiek aiynan bastap engızıledı, dep habarlaidy "Adyrna" ūlttyq portaly fergana.agency-ge sılteme jasap.
Būl reforma bılım sapasyn arttyryp, ūlttyq bılım beru jüiesın halyqaralyq deŋgeige säikestendırudı közdeidı.
Jaŋa standart boiynşa mektepter 12 jyldyq oqytu jüiesıne köşedı. Oqu üderısı üş deŋgeige bölınedı: bastauyş (1-6 synyptar), negızgı (7-9 synyptar) jäne orta bılım beru (10-12 synyptar). Sonymen qatar, oquşylardy baǧalau jüiesı özgerıp, 1-3 synyptarda dästürlı baǧa qoiu alynyp tastalady, al 4-synyptan bastap balldyq baǧalau jüiesı engızıledı. 7-12 synyptarda kriterialdy baǧalau ädısı qoldanylyp, oquşylardyŋ özın-özı baǧalau daǧdylaryn damytuǧa baǧyttalady.
Jaŋartylǧan jüiege säikes, alty jastaǧy balalar 1-synypqa qabyldansa, jetı jastaǧy balalar bırden 2-synypqa barady. 3-synypty aiaqtaǧan oquşylar 5-synypqa, al 6-synypty aiaqtaǧandar 8-synypqa auystyrylady. Jaŋa bılım beru baǧdarlamasy boiynşa alǧaşqy attestattar 2027/2028 oqu jylynda berıledı, al tolyqqandy 12 jyldyq mekteptıŋ alǧaşqy tülekterı 2036/2037 oqu jylynda mektep bıtıredı.
Qyrǧyzstannyŋ bılım ministrı Dogdurkül Kendirbaevanyŋ aituynşa, 12 jyldyq jüiege köşuge bailanysty bakalavriattyŋ oqu merzımı 4 jyldan 3 jylǧa qysqartylady, sebebı keibır universitettık baǧdarlamalar mekteptıŋ joǧary synyptarynda oqytylatyn bolady.
