Qyrǵyzstan úkimeti jalpy bilim berýdiń jańa memlekettik standartyn bekitti. Jańa júıe 2025 jyldyń qyrkúıek aıynan bastap engiziledi, dep habarlaıdy "Adyrna" ulttyq portaly fergana.agency-ge silteme jasap.
Bul reforma bilim sapasyn arttyryp, ulttyq bilim berý júıesin halyqaralyq deńgeıge sáıkestendirýdi kózdeıdi.
Jańa standart boıynsha mektepter 12 jyldyq oqytý júıesine kóshedi. Oqý úderisi úsh deńgeıge bólinedi: bastaýysh (1-6 synyptar), negizgi (7-9 synyptar) jáne orta bilim berý (10-12 synyptar). Sonymen qatar, oqýshylardy baǵalaý júıesi ózgerip, 1-3 synyptarda dástúrli baǵa qoıý alynyp tastalady, al 4-synyptan bastap balldyq baǵalaý júıesi engiziledi. 7-12 synyptarda krıterıaldy baǵalaý ádisi qoldanylyp, oqýshylardyń ózin-ózi baǵalaý daǵdylaryn damytýǵa baǵyttalady.
Jańartylǵan júıege sáıkes, alty jastaǵy balalar 1-synypqa qabyldansa, jeti jastaǵy balalar birden 2-synypqa barady. 3-synypty aıaqtaǵan oqýshylar 5-synypqa, al 6-synypty aıaqtaǵandar 8-synypqa aýystyrylady. Jańa bilim berý baǵdarlamasy boıynsha alǵashqy attestattar 2027/2028 oqý jylynda beriledi, al tolyqqandy 12 jyldyq mekteptiń alǵashqy túlekteri 2036/2037 oqý jylynda mektep bitiredi.
Qyrǵyzstannyń bilim mınıstri Dogdýrkúl Kendırbaevanyń aıtýynsha, 12 jyldyq júıege kóshýge baılanysty bakalavrıattyń oqý merzimi 4 jyldan 3 jylǵa qysqartylady, sebebi keıbir ýnıversıtettik baǵdarlamalar mekteptiń joǵary synyptarynda oqytylatyn bolady.
