قۇلسارى قالاسىنىڭ «بولاشاق» شاعىن اۋدانىنداعى تۇرعىندار جاڭادان بەرىلگەن ۇيلەردىڭ ساپاسىنا كوڭىلى تولمايتىندىقتارىن ايتىپ، شاعىمدانۋدا. ولار قابىرعالاردىڭ جارىلىپ، ۇيلەردىڭ اپاتتى جاعدايعا تۇسكەنىن جەتكىزدى، دەپ حابارلايدى "ادىرنا" ۇلتتىق پورتالى KYN.KZ اگەنتتىگىنە سىلتەپ.
سۋ تاسقىنىنان كەيىن جاڭا باسپانا العان تۇرعىنداردىڭ ءبىرى زاميرا الاكاەۆا ءوز ۇيىندە جارىقتار پايدا بولعانىن ايتتى.
"8 ناۋرىز كۇنى تاڭەرتەڭ قابىرعالاردا جارىقتار پايدا بولعانىن بايقادىم. دەرەۋ مەردىگەر كومپانياعا حابارلاستىم. ولار ماماندار جىبەرەمىز دەدى، بىراق ەشكىم كەلگەن جوق. تەك 9 ناۋرىزدا اكىمدىككە شاعىمدانعان سوڭ عانا ماماندار كەلدى", — دەيدى تۇرعىن.
جىلىوي اۋدانى اكىمىنىڭ ورىنباسارى گۇلنافيز ايشۋاقوۆا قۇرىلىس باسقارماسى جاعدايدان حاباردار ەكەنىن جانە تەكسەرىس ءجۇرىپ جاتقانىن حابارلادى. ال وبلىستىق قۇرىلىس باسقارماسىنىڭ باسشىسى نۇربەرگەن قۇساينوۆ ماسەلەنى زەرتتەۋ ءۇشىن ارنايى ماماندار جىبەرىلگەنىن مالىمدەدى.
قۇلسارىداعى جاڭا ۇيلەردى سالۋ بويىنشا تاپسىرىستى وبلىستىق قۇرىلىس باسقارماسى بەرگەن. قۇرىلىس جۇمىستارىنا سەگىز مەردىگەر كومپانيا تارتىلعان.
قۇرىلىس باسقارماسى ۇيلەردىڭ كەپىلدىك مەرزىمى ءبىر جىل ەكەنىن اتاپ ءوتتى. ەگەر ۇيلەردە كەمشىلىكتەر انىقتالسا، جوندەۋ جۇمىستارى مەردىگەرلەردىڭ ەسەبىنەن جاسالاتىنى ايتىلدى.
ء"بىز ءتيىستى كومپانيالارعا رەسمي حات جولداپ، ءوز ەسەبىنەن قالپىنا كەلتىرۋ جانە تەحنيكالىق زەرتتەۋ جۇمىستارىن جۇرگىزۋدى تالاپ ەتەمىز. بارلىق اقاۋلار كەپىلدىك مەرزىمى ىشىندە جوندەلەدى", — دەدى نۇربەرگەن قۇساينوۆ.
