Qulsary qalasynyń «Bolashaq» shaǵyn aýdanyndaǵy turǵyndar jańadan berilgen úılerdiń sapasyna kóńili tolmaıtyndyqtaryn aıtyp, shaǵymdanýda. Olar qabyrǵalardyń jarylyp, úılerdiń apatty jaǵdaıǵa túskenin jetkizdi, dep habarlaıdy "Adyrna" ulttyq portaly KYN.KZ agenttigine siltep.
Sý tasqynynan keıin jańa baspana alǵan turǵyndardyń biri Zamıra Alakaeva óz úıinde jaryqtar paıda bolǵanyn aıtty.
"8 naýryz kúni tańerteń qabyrǵalarda jaryqtar paıda bolǵanyn baıqadym. Dereý merdiger kompanııaǵa habarlastym. Olar mamandar jiberemiz dedi, biraq eshkim kelgen joq. Tek 9 naýryzda ákimdikke shaǵymdanǵan soń ǵana mamandar keldi", — deıdi turǵyn.
Jylyoı aýdany ákiminiń orynbasary Gúlnafız Aıshýaqova qurylys basqarmasy jaǵdaıdan habardar ekenin jáne tekseris júrip jatqanyn habarlady. Al oblystyq qurylys basqarmasynyń basshysy Nurbergen Qusaınov máseleni zertteý úshin arnaıy mamandar jiberilgenin málimdedi.
Qulsarydaǵy jańa úılerdi salý boıynsha tapsyrysty oblystyq qurylys basqarmasy bergen. Qurylys jumystaryna segiz merdiger kompanııa tartylǵan.
Qurylys basqarmasy úılerdiń kepildik merzimi bir jyl ekenin atap ótti. Eger úılerde kemshilikter anyqtalsa, jóndeý jumystary merdigerlerdiń esebinen jasalatyny aıtyldy.
"Biz tıisti kompanııalarǵa resmı hat joldap, óz esebinen qalpyna keltirý jáne tehnıkalyq zertteý jumystaryn júrgizýdi talap etemiz. Barlyq aqaýlar kepildik merzimi ishinde jóndeledi", — dedi Nurbergen Qusaınov.
