اقتوبە وبلىسىندا پوشتا قىزمەتكەرلەرى جالاقىنىڭ ازدىعىنا نارازىلىق بىلدىرۋدە. ايتۋلارىنشا، قازىرگى قىمباتشىلىق جاعدايىندا 62 مىڭ تەڭگە جالاقى كۇنكورىسكە جەتپەيدى. ونىڭ ۇستىنە، جۇمىس كولەمى اۋىر، ال تولەنەتىن ەڭبەكاقى لايىقتى دەڭگەيدە ەمەس، دەپ حابارلايدى "ادىرنا" ۇلتتىق پورتالى ەۋرازيا ءبىرىنشى ارناسىنا سىلتەمە جاساپ.
بۇگىندە ايماقتا 600-دەن استام پوشتاشى جۇمىس ىستەيدى. ولاردىڭ ءبىر بولىگى كەلىسىمشارت ارقىلى ەڭبەكتەنۋدە. پوشتا قىزمەتكەرلەرىنىڭ ايتۋىنشا، ءبىر حاتتى جەتكىزۋ قۇنى 85 تەڭگە، ال گازەت تاسىمالداۋ اقىسى – 12 تەڭگە عانا. مۇنداي تومەن باعا جۇمىسشىلاردىڭ تابىسىن تىم ماردىمسىز ەتىپ وتىر.
“مەن كەلىسىمشارت نەگىزىندە جۇمىس ىستەيمىن. جالاقىم تاسىمالداعان گازەت پەن حات سانىنا قاراي ەسەپتەلەدى. ناتيجەسىندە، كۇنىنە ورتا ەسەپپەن 2 مىڭ تەڭگە عانا تابۋىم مۇمكىن. بۇل وتە از. قازىرگى قىمباتشىلىق جاعدايىندا اي سايىن 62 مىڭ تەڭگە تابىس تابۋ قيىن. ونىڭ جارتىسى جالعا الىنعان پاتەرگە كەتەدى”، – دەيدى پوشتاشى گۇلزيرا جۇمالينا.
پوشتاشىلاردىڭ تاعى ءبىر بولىگى كەلىسىمشارتسىز جۇمىس ىستەيدى. بۇل جاعدايدا ءار تاسىمالدانعان حات پەن گازەت ءۇشىن جەكە اقى تولەنەدى. بىراق، جۇمىس قيىن بولعانىمەن، بەرىلەتىن تولەم ەڭبەكتى اقتامايدى.
“مىسالى، مەن 5-ۋچاستكەدە تۇرسام، بىراق جەتكىزۋ كەرەك حات 99-ۋچاستكەگە جىبەرىلۋى مۇمكىن. بۇل – ۇزاق قاشىقتىق. كەيدە مەكەنجايعا بارعانىمىزدا، يەلەرى كوشىپ كەتكەن نەمەسە حاتتى الۋدان باس تارتقان بولىپ شىعادى. مۇنداي جاعدايدا ءبىز حاتتى قايتا الىپ كەلەمىز، بىراق تەك جەتكىزىلگەن حاتتارعا عانا اقشا تولەنەدى. كەلىسىمشارت نەگىزىندەگى ايلىعىم 58-62 مىڭ تەڭگەدەن اسپايدى”، – دەيدى پوشتا قىزمەتكەرى ليۋدميلا كۋباەۆا.
الايدا “قازپوچتا” باسشىلىعى 62 مىڭ تەڭگە كولەمىندە جالاقى تولەنبەيتىنىن العا تارتتى. فيليال ديرەكتورى دينارا حاسانعاليەۆا جالاقى مولشەرى ورىندالعان جۇمىس كولەمىنە بايلانىستى ەكەنىن ءتۇسىندىردى.
“بىزدە 65 مىڭ تەڭگە كولەمىندەگى تۇراقتى جالاقى جوق. بارلىعى ورىندالعان جۇمىسقا بايلانىستى. قانشا گازەت، حات، جۋرنال تاسىمالداعانىنا قاراي تولەنەدى. ماسەلەن، كەيبىر قىزمەتكەرلەر 150-180 مىڭ تەڭگەگە دەيىن تابىس تابادى. بۇل جۇمىس كولەمىنە تىكەلەي بايلانىستى”، – دەدى ول.
“قازپوچتا” باسقارما ءتورايىمى اسەل جاناسوۆا دا قىزمەتكەرلەر جالاقىسىنىڭ تومەن ەكەنىن مويىنداپ، ولاردىڭ كوبىنىڭ قوسىمشا جۇمىستارى بار ەكەنىن ايتتى.
“مەنىڭ ايلىعىم – 1 ميلليون 200 مىڭ تەڭگە. بىزدە تولىق ەمەس جۇمىس كۇنىمەن ىستەيتىن قىزمەتكەرلەر بار. كەيبىرى باسقا جەردە تىركەلمەي جۇمىس ىستەپ، تەك قوسىمشا تابىس ءۇشىن بىزگە كەلەدى. ارينە، ولاردىڭ تابىسى از بولىپ كورىنەدى. بىراق ولاردىڭ ەكى-ءۇش جۇمىسى بار”، – دەدى ول.
ايتا كەتەيىك، بۇعان دەيىن “قازپوچتادا” 273 ميلليون تەڭگەدەن استام قارجى جىمقىرۋ، الاياقتىق، ۇرلىق جانە پارا الۋ فاكتىلەرى انىقتالعان بولاتىن.
