فرانتسيا ۋكرايناعا 195 ميلليون ەۋرو كولەمىندە قارۋ-جاراق پەن وق-ءدارى جەتكىزەدى. بۇل قارجى رەسەيدىڭ بۇعاتتالعان اكتيۆتەرىنەن تۇسكەن پايىزدىق تابىس ەسەبىنەن بولىنەدى، دەپ حابارلايدى "ادىرنا" ۇلتتىق پورتالى.
بۇل تۋرالى فرانتسيانىڭ قورعانىس ءمينيسترى سەباستيان لەكورنيۋ Tribune Dimanche باسىلىمىنا بەرگەن سۇحباتىندا مالىمدەدى.
ءمينيستردىڭ ايتۋىنشا، بولىنگەن قاراجات ۋكرايناعا 155 مم كاليبرلى سناريادتار مەن AASM باسقارىلاتىن بومبالارىن جەتكىزۋگە جۇمسالادى. بۇل بومبالار Mirage 2000 جويعىش ۇشاقتارىندا قولدانىلادى.
جۋىردا ۋكراينا قارۋلى كۇشتەرى فرانتسيا بەرگەن Mirage 2000 ۇشاقتارىن العاش رەت قولدانعانىن حابارلادى.
بۇعان قوسا، لەكورنيۋ ءپاريجدىڭ ۋكرايناعا AMX-10RC تانكتەرى مەن VAB برونەترانسپورتەرلەرىن جىبەرۋدى جەدەلدەتەتىنىن ايتتى.
ايتا كەتەيىك، ارنايى اسكەري وپەراتسيا باستالعاننان كەيىن اقش، G7 ەلدەرى مەن ەۋرووداق رەسەيدىڭ 300 ميلليارد ەۋروعا جۋىق ۆاليۋتالىق رەزەرۆتەرىن بۇعاتتادى. ونىڭ ىشىندە 200 ميلليارد ەۋرو ەو اۋماعىندا، اسىرەسە بەلگياداعى Euroclear ەسەپ ايىرىسۋ جۇيەسىندە ساقتاۋلى.
