شۋاقتى كوكتەم مەرەكەسىنىڭ قارساڭىندا اسەمدىك پەن ادەمىلىكتىڭ، جىلۋلىق پەن جاراسىمدىلىقتىڭ، مەيىرىم مەن ماحابباتتىڭ سيمۆولى ىسپەتتەس جانى نازىك جان دەمەسەڭىز ...، ايەل زاتى – قوعام دامۋىنا قوزعاۋ سالىپ، قاي ءىس بولسىن بەل ورتاسىنان تابىلىپ، مەملەكەتتىڭ وركەندەۋ جولىندا ەر-ازاماتتارمەن يىق تىرەستىرىپ ەڭبەك ەتىپ جۇرگەن ايەلدەر ەرەكشە ءرول اتقارۋدا. كەز كەلگەن ءىس باسىندا ايەلدەردىڭ كاسىبي بىلىكتىلىگى مەن جاۋاپكەرشىلىگى ايقىن اڭعارىلعان.
ولار قانداي ورتا بولماسىن ۇندەستىك پەن ۇيلەسىمدى، ءوزارا تۇسىنىستىك پەن تاتۋلىقتى جانە ىنتىماقتى نىعايتۋعا ۇيىتقى بولعان جاندار. مەملەكەتىمىز ساياسي وزگەرىستەر مەن جۇيەلى جاڭعىرۋ كەزەڭىندە ايەلدەر قاۋىمىنىڭ جاسامپازدىق قاسيەتى مەن كۇش-قۋاتى جاڭا قازاقستاننىڭ ىلگەرىلەۋىنە سەپتىگىن تيگىزۋدە دەسەك، ارتىق ايتقاندىق بولماس...
وتان الدىنداعى ادال مىندەتتەرىن دە اتقارىپ جۇرگەندەرى قانشاما. ونداي دارا تۇلعالاردان قازاقستان رەسپۋبليكاسى ۇقك شەكارا اكادەمياسىندا اسكەري سالادا جۇرگەن قىز-كەلىنشەكتەر دە از ەمەس. سولاردىڭ ءبىرى – سانالى عۇمىرىن اسكەري سالاعا ارناعان تاجىريبەلى شەكاراشى، وسكەلەڭ ۇرپاقتى ءبىلىم نارىمەن سۋسىنداتىپ جۇرگەن، ونەگەلى ءتالىم-تاربيە بەرۋ ءىسىنىڭ بىلىكتى كاسىبي وفيتسەرى پولكوۆنيك دجامپەيسوۆا جۋلدىز گيزاتوۆنا.
ادەتتە قازاق ايەلىنىڭ عۇمىرى بىلايشا ورىلەدى عوي: اتا-اناسىن قۋانتىپ ومىرگە كەلەدى، بوي جەتىپ، ءبىلىم الىپ، بوساعا وزگەرتىپ، تۇرمىس قۇرادى، بالالى-شاعالى بولادى.
ال ءبىزدىڭ كەيىپكەرىمىزدىڭ ءومىر جولى باسقا قىرىنان ورىلگەن: پولكوۆنيك دجامپەيسوۆا جۋلدىز گيزاتوۆنا، 1980 جىلى جەتىسۋ ولكەسىنىڭ تورىندەگى تالدىقورعان قالاسىندا زيالى وتباسىندا دۇنيەگە كەلگەن (قىسقاشا انىقتاما: اكەسى دجامپەيسوۆ گيزات وماربەكوۆيچ – كاسىبي زاڭگەر، سوت ورگانىندارىندا كوپ جىلدار بويى سوت تورەشىسى لاۋازىمىن اتقارعان، ال اناسى يساەۆا كالامكاس ەسەنكۋلوۆنا – وبلىستىق اكىمشىلىكتە اۋىل شارۋاشىلىق باسقارماسىنىڭ باستىعى قىزمەتىندە بولعان. بۇگىنگى تاڭدا قاريالار بالا-شاعاسى مەن نەمەرەلەرىنىڭ ورتاسىندا باقىتتى جاندار ءارى قۇرمەتتى زەينەتكەرلىكتە). بىرەۋ بىلسە، بىرەۋ بىلمەس دەگەندەي تالدىقورعان قالاسىندا وماربەك جامپەيسوۆ اتىندا ۇلكەن كوشە بار. كەزىندە قالالىق اتقارۋ كوميتەتىنىڭ (گوريسپولكوم*) حاتشىسى بولعان، مەملەكەت قايراتكەرى و. جامپەيسوۆ كەيىپكەرىمىزدىڭ اتاسى بولىپ كەلەدى. ەمەن اعاشتىڭ تامىرى تەرەڭدە جاتىر، تەكتى جەردەن تاربيە العان تۇلعامىز وسىنداي دەپ نىق ايتۋعا بولادى.
1997-2001 جىلدار ارالىعىندا ءىلياس جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتى فيلولوگيا فاكۋلتەتىنىڭ اعىلشىن ءتىلى ماماندىعى بويىنشا بىتىرگەن. جۋلدىز گيزاتوۆنانىڭ ايتۋىنشا، 4-كۋرستى ءتامامداپ قالعاندا قازاقستان رەسپۋبليكاسى ۇقك جەتىسۋ وبلىستىق دەپارتامەنتىنەن وكىلدەر كەلىپ، سول كەزدەگى قر ۇقك اسكەري ينستيتۋتىنا وقۋعا ءتۇسۋ ءۇشىن ۇزدىك ستۋدەنتتەردى ىرىكتەگەن. ۇزدىكتەردىڭ قاتارىنان تابىلعان جۋلدىز گيزاتوۆنا دەرەۋ قاجەتتى قۇجاتتارىن جيناپ، الداعى ءومىرىن اسكەري سالامەن بايلانىستىرعىسى كەلىپ، كوپ ۇزاماي ارۋ قالا، ارمان قالا الماتىعا جول تارتقان ەدى. سىناقتاردان سۇرىنبەي ءوتىپ، اتالمىش جوعارى اسكەري وقۋ ورنىنا وقۋعا ءتۇسىپ، كۋرسانت اتانعان. اسكەري جوعارى وقۋ ورنىن ءبىتىرىپ، قوس جۇلدىزدى يىعىنا تاققان «لەيتەنانت» العاشقى وفيتسەرلىك قىزمەت جولىن سول كەزدەگى «الماتى» شەكارالىق باقىلاۋ پۋنكتى جولاۋشىلار ءبولىمىنىڭ اعا باقىلاۋشىسى لاۋازىمىنان باستاعان ەدى. كەيىننەن قىزمەتتىك قاجەتتىلىككە بايلانىستى قازىرگى قازاقستان رەسپۋبليكاسى ۇقك شەكارا اكادەمياسىنا اۋىسىپ كەلىپ، ۇستازدىق جولعا بەت بۇرعان. سودان بەرى ۇقك شەكارا اكادەمياسى 1-فاكۋلتەتىنىڭ 13-ارنايى كافەدراسىندا قىزمەت اتقارا ءجۇرىپ، قانشاما كۋرسانتتىڭ شام-شىراعىن جاعىپ، ءبىلىمدى كاسىبي مامان وفيتسەر بولىپ قالىپتاسۋىنا ءوز ۇلەسىن قوسىپ كەلەدى.
شەكارا اكادەمياسىندا وزىندىك ويىپ تۇرىپ ورنىن العان «پولكوۆنيكتى» ءبارى جاقسى بىلەدى. ويتكەنى، ول وزىنە جۇكتەلگەن جاۋاپتى مىندەتتىڭ ۇدەسىنەن شىعىپ، شاكىرت تاربيەلەپ جۇرگەن ۇلاعاتتى ۇستاز. اعىلشىن ءتىلىن جەتىك مەڭگەرتىپ، دۇنيەتانىمدارىن جەتىلدىرۋىنىڭ ارقاسىندا كۋرسانتتارى عىلىمي-تاجىريبەلىك كونفەرەنتسيالاردا، سەمينارلاردا، عىلىمي سايىستاردا جۇلدەلى ورىنداردى يەلەنىپ، وزا شاۋىپ كەلەدى. شەت تىلدەر كافەدراسىنىڭ پروفەسسورلىق-وقىتۋشىلىق قۇرامىمەن اي سايىن جوعارى ادىستەمەلىك ساباقتاردى ۇيىمداستىرىپ وتكىزۋ ونىڭ ەڭ سۇيىكتى ءىسى.
پولكوۆنيك ج.گ. دجامپەيسوۆانىڭ 2024 جىلى جانە اعىمداعى جىلدىڭ بۇگىنگى كۇنىنە دەيىن 9 عىلىمي جۇمىسى ءارتۇرلى باسىلىمداردا جارىق كوردى. اتاپ ايتقاندا: «English Reading and Listening Practice» وقۋ جانە تىڭداۋدى دامىتۋعا ارنالعان اعىلشىن تىلىندەگى وقۋلىقتىڭ جانە «English for A2 Level» (الەۋمەتتىك-مادەني، وقۋ جانە كاسىبي قارىم-قاتىناس سالاسى) وقۋ-ادىستەمەلىك جۇمىستاردىڭ اۆتورى.
ماعجان جۇماباەۆ اتامىز «التى الاشتىڭ باسى قوسىلسا – ءتور مۇعالىمدىكى» دەگەندەي، شالعايداعى مەملەكەتتىك شەكارانى قورعاۋشى بولاشاق مامان وفيتسەرلەرگە ءتىل ۇيرەتىپ، كوكىرەگىنە نۇر شاشقان كەيىپكەرىمىز ۇلتتىڭ ايناسى بولۋعا ابدەن لايىقتى عوي. جاقىندا عانا پولكوۆنيك ج.گ. دجامپەيسوۆانىڭ تىكەلەي جەتەكشىلىگىمەن شەكارا اكادەمياسىنىڭ كۋرسانتى ە. نۋرلان ءال-فارابي اتىنداعى قازاق ۇلتتىق ۋنيۆەرسيتەتىندە الماتى قالاسىنىڭ جوو-نىڭ اراسىندا وتكەن «فارابي الەمى» اتتى حالىقارالىق عىلىمي-پراكتيكالىق كونفەرەنتسياسىنا قاتىسىپ، جۇلدەگەر اتاندى.
ارىپتەسىمىزدىڭ جانە ونىڭ جەتەكشىلىك ەتەتىن جۇمىستارى ارقىلى جەتكەن جەتىستىكتەرىن وسىلاي جىپكە تىزگەن مونشاقتاي تىزبەلەپ جازا بەرۋگە بولار ەدى. ايتسە دە، ونىڭ بارلىعىن ءبىر ماقالا كولەمىنە سىيعىزۋ مۇمكىن ەمەس. سوندىقتان ءبىز ونىڭ ەڭ باستىلارىنا عانا توقتالدىق.
كەيىپكەرىمىز عاسىرعا جۋىق تاريحى بار ۇقك شەكارا اكادەمياسىندا قىزمەت اتقارا ءجۇرىپ، «لەيتەنانت» پوگونىنان «پولكوۆنيك» پوگونىنا دەيىن جەتكەن قازاقتان شىققان ساناۋلى قىزداردىڭ ءبىرى.
جۋلدىز گيزاتوۆنانىڭ قىزمەتتىك جولىندا جەڭىستى، ءھام جەمىستى ساتتەرى جەتەرلىك. 2011 جىلى ءىى دارەجەلى «شەكارا اسكەرلەرىنىڭ ۇزدىگى» بەلگىسىمەن، ۇلتتىق قاۋىپسىزدىكتى قامتاماسىز ەتۋدەگى قىزمەتتىك ءىس-قيمىلدا قول جەتكىزگەن وڭ ناتيجەلەرى مەن مىندەتتەرىن ادال ورىنداعانى ءۇشىن قازاقستان رەسپۋبليكاسى ۇقك، شەكارا قىزمەتىنىڭ جانە شەكارا اكادەمياسى باستىعىمەن جانە ونىڭ ورىنباسارلارىمەن، فاكۋلتەت، كافەدرا باسشىلىعىمەن ماراپاتتالعان.
مىقتى كاسىبي مامان – ارقاشان دا ۇجىمنىڭ ماقتانىشى. پولكوۆنيك حانىمنان تاعلىمدى ءبىلىمىن العان كۋرسانتتارى بۇگىندە ەل قۇرمەتىنە بولەنىپ، ەڭبەگىنىڭ ەلەنىپ جۇرگەنى ءوز الدىنا بولەك اڭگىمە.
ءوز ىسىنە جانىمەن بەرىلگەن جۋلدىز گيزاتوۆنامەن قىزمەت بابىندا ءجيى كەزدەسەمىز. قىزمەتىنىڭ ءار مينۋتىن جۇيەلى پايدالانۋعا، ساباعىنا تياناقتى دايىندالۋعا داعدىلانعان جان. ءوزىن-ءوزى دامىتىپ، عىلىم-بىلىمگە ابدەن دەن قويعان كوزى اشىق، كوكىرەگى وياۋ تاجىريبەلى مامان. سونىمەن قاتار، كافەدرا، فاكۋلتەتتىڭ، شەكارا اكادەمياسىنىڭ قوعامدىق جۇمىستارىنا دا بەلسەنە ات سالىسادى. ءوز سالاسى بويىنشا بىرنەشە وقۋ-ادىستەمەلىك دۇنيەلەردى جارىققا شىعارىپ ۇلگەرگەن ول وتباسىندا مەيىرىمدى انا، ادال جار.
جۋلدىز گيزاتوۆنا بولاشاق جولداسى مارات پولاتكارىەۆيچپەن شەكارا اكادەمياسىنىڭ قابىرعاسىندا وقىپ ءجۇرىپ، ورىمدەي جاپ-جاس كۋرسانت كەزىندە تانىسقان. سول جىلدارى قوس عاشىقتىڭ دوستىعى ۇلكەن ماحابباتقا ۇلاسقان ەدى. ولەردەي عاشىق بولىپ، ورىمدەي جاس قىزدى ۋىسىنا تۇسىرگەن جاس وفيتسەر كوپ ويلانباستان سۇلۋ قىزعا ۇيلەنۋگە ۇسىنىس بىلدىرگەن ەكەن. وسىلايشا وتباسىن قۇرىپ، التىن اسىقتاي ۇل مەن كۇمىس قاسىقتاي قىز تاربيەلەگەن اتا-اناعا اينالعان قوس پولكوۆنيك، بۇگىندە ەل ماقتاپ ءارى تامساندىرعان ۇلگىلى جانۇياعا اينالادى. وسىنداي ۇلكەن ماحابباتقا تولى قىزىق ءومىر جولىن ناقىشىنا كەلتىرە اڭگىمەلەپ بەرگەن نازىك جانىمىز، ءوزىنىڭ شەكاراشى ماماندىعىن تاڭداعانىن ماقتان تۇتادى. بۇگىندە كۇنتىزبەلىك اسكەري قىزمەت ءوتىلى 25 جىل.
ءيا، ەپتىلىك پەن قىراعىلىقتى، وجەتتىك پەن قايسار مىنەزدى تالاپ ەتەتىن اسكەري سالادا قىزمەت اتقارۋ ەكىنىڭ ءبىرىنىڭ ماڭدايىنا بەرە بەرمەيتىن باق دەپ بىلەمىز. ولاي بولسا، اسكەري قىزمەت پەن ۇستازدىقتى قاتار الىپ جۇرگەن نازىك جاندى پولكوۆنيك جۋلدىز گيزاتوۆنانى 8 ناۋرىز – حالىقارالىق ايەلدەر مەرەكەسىمەن شىن جۇرەكتەن قۇتتىقتاي وتىرىپ، قىزىعى مەن قيىنى قاتار جۇرەتىن اسكەري قىزمەتىڭىزگە تولاعاي تابىستار تىلەيمىز.
نازىك جاندى پولكوۆنيك حانىم، كوكتەم مەرەكەسى كوڭىلىڭىزگە تەك شاتتىق سىيلاسىن دەگىمىز كەلەدى.
جانات جابىربەكوۆ،
قر ۇقك شەكارا اكادەمياسىنىڭ
ءباسپاسوز حاتشىسى
