Şuaqty köktem merekesınıŋ qarsaŋynda äsemdık pen ädemılıktıŋ, jylulyq pen jarasymdylyqtyŋ, meiırım men mahabbattyŋ simvoly ıspettes jany näzık jan demeseŋız ..., äiel zaty – qoǧam damuyna qozǧau salyp, qai ıs bolsyn bel ortasynan tabylyp, memlekettıŋ örkendeu jolynda er-azamattarmen iyq tırestırıp eŋbek etıp jürgen äielder erekşe röl atqaruda. Kez kelgen ıs basynda äielderdıŋ käsıbi bılıktılıgı men jauapkerşılıgı aiqyn aŋǧarylǧan.
Olar qandai orta bolmasyn ündestık pen üilesımdı, özara tüsınıstık pen tatulyqty jäne yntymaqty nyǧaituǧa ūiytqy bolǧan jandar. Memleketımız saiasi özgerıster men jüielı jaŋǧyru kezeŋınde äielder qauymynyŋ jasampazdyq qasietı men küş-quaty Jaŋa Qazaqstannyŋ ılgerıleuıne septıgın tigızude desek, artyq aitqandyq bolmas...
Otan aldyndaǧy adal mındetterın de atqaryp jürgenderı qanşama. Ondai dara tūlǧalardan Qazaqstan Respublikasy ŪQK Şekara akademiiasynda äskeri salada jürgen qyz-kelınşekter de az emes. Solardyŋ bırı – sanaly ǧūmyryn äskeri salaǧa arnaǧan täjıribelı şekaraşy, öskeleŋ ūrpaqty bılım närımen susyndatyp jürgen, önegelı tälım-tärbie beru ısınıŋ bılıktı käsıbi ofiserı polkovnik Djampeisova Juldyz Gizatovna.
Ädette qazaq äielınıŋ ǧūmyry bylaişa örıledı ǧoi: ata-anasyn quantyp ömırge keledı, boi jetıp, bılım alyp, bosaǧa özgertıp, tūrmys qūrady, balaly-şaǧaly bolady.
Al bızdıŋ keiıpkerımızdıŋ ömır joly basqa qyrynan örılgen: polkovnik Djampeisova Juldyz Gizatovna, 1980 jyly Jetısu ölkesınıŋ törındegı Taldyqorǧan qalasynda ziialy otbasynda düniege kelgen (qysqaşa anyqtama: äkesı Djampeisov Gizat Omarbekovich – käsıbi zaŋger, sot organyndarynda köp jyldar boiy sot töreşısı lauazymyn atqarǧan, al anasy İsaeva Kalamkas Esenkulovna – oblystyq äkımşılıkte auyl şaruaşylyq basqarmasynyŋ bastyǧy qyzmetınde bolǧan. Bügıngı taŋda qariialar bala-şaǧasy men nemerelerınıŋ ortasynda baqytty jandar ärı qūrmettı zeinetkerlıkte). Bıreu bılse, bıreu bılmes degendei Taldyqorǧan qalasynda Omarbek Jampeisov atynda ülken köşe bar. Kezınde qalalyq atqaru komitetınıŋ (gorispolkom*) hatşysy bolǧan, memleket qairatkerı O. Jampeisov keiıpkerımızdıŋ atasy bolyp keledı. Emen aǧaştyŋ tamyry tereŋde jatyr, tektı jerden tärbie alǧan tūlǧamyz osyndai dep nyq aituǧa bolady.
1997-2001 jyldar aralyǧynda Iliias Jansügırov atyndaǧy Jetısu memlekettık universitetı filologiia fakultetınıŋ aǧylşyn tılı mamandyǧy boiynşa bıtırgen. Juldyz Gizatovnanyŋ aituynşa, 4-kursty tämamdap qalǧanda Qazaqstan Respublikasy ŪQK Jetısu oblystyq departamentınen ökılder kelıp, sol kezdegı QR ŪQK Äskeri institutyna oquǧa tüsu üşın üzdık studentterdı ırıktegen. Üzdıkterdıŋ qatarynan tabylǧan Juldyz Gizatovna dereu qajettı qūjattaryn jinap, aldaǧy ömırın äskeri salamen bailanystyrǧysy kelıp, köp ūzamai aru qala, arman qala Almatyǧa jol tartqan edı. Synaqtardan sürınbei ötıp, atalmyş joǧary äskeri oqu ornyna oquǧa tüsıp, kursant atanǧan. Äskeri joǧary oqu ornyn bıtırıp, qos jūldyzdy iyǧyna taqqan «leitenant» alǧaşqy ofiserlık qyzmet jolyn sol kezdegı «Almaty» şekaralyq baqylau punktı jolauşylar bölımınıŋ aǧa baqylauşysy lauazymynan bastaǧan edı. Keiınnen qyzmettık qajettılıkke bailanysty qazırgı Qazaqstan Respublikasy ŪQK Şekara akademiiasyna auysyp kelıp, ūstazdyq jolǧa bet būrǧan. Sodan berı ŪQK Şekara akademiiasy 1-fakultetınıŋ 13-arnaiy kafedrasynda qyzmet atqara jürıp, qanşama kursanttyŋ şam-şyraǧyn jaǧyp, bılımdı käsıbi maman ofiser bolyp qalyptasuyna öz ülesın qosyp keledı.
Şekara akademiiasynda özındık oiyp tūryp ornyn alǧan «polkovniktı» bärı jaqsy bıledı. Öitkenı, ol özıne jüktelgen jauapty mındettıŋ üdesınen şyǧyp, şäkırt tärbielep jürgen ūlaǧatty ūstaz. Aǧylşyn tılın jetık meŋgertıp, dünietanymdaryn jetıldıruınıŋ arqasynda kursanttary ǧylymi-täjıribelık konferensiialarda, seminarlarda, ǧylymi saiystarda jüldelı oryndardy ielenıp, oza şauyp keledı. Şet tılder kafedrasynyŋ professorlyq-oqytuşylyq qūramymen ai saiyn joǧary ädıstemelık sabaqtardy ūiymdastyryp ötkızu onyŋ eŋ süiıktı ısı.
Polkovnik J.G. Djampeisovanyŋ 2024 jyly jäne aǧymdaǧy jyldyŋ bügıngı künıne deiın 9 ǧylymi jūmysy ärtürlı basylymdarda jaryq kördı. Atap aitqanda: «English Reading and Listening Practice» oqu jäne tyŋdaudy damytuǧa arnalǧan aǧylşyn tılındegı oqulyqtyŋ jäne «English for A2 Level» (äleumettık-mädeni, oqu jäne käsıbi qarym-qatynas salasy) oqu-ädıstemelık jūmystardyŋ avtory.
Maǧjan Jūmabaev atamyz «Alty alaştyŋ basy qosylsa – tör mūǧalımdıkı» degendei, şalǧaidaǧy Memlekettık şekarany qorǧauşy bolaşaq maman ofiserlerge tıl üiretıp, kökıregıne nūr şaşqan keiıpkerımız ūlttyŋ ainasy boluǧa äbden laiyqty ǧoi. Jaqynda ǧana polkovnik J.G. Djampeisovanyŋ tıkelei jetekşılıgımen Şekara akademiiasynyŋ kursanty E. Nurlan Äl-Farabi atyndaǧy Qazaq ūlttyq universitetınde Almaty qalasynyŋ JOO-nyŋ arasynda ötken «Farabi älemı» atty Halyqaralyq ǧylymi-praktikalyq konferensiiasyna qatysyp, jüldeger atandy.
Ärıptesımızdıŋ jäne onyŋ jetekşılık etetın jūmystary arqyly jetken jetıstıkterın osylai jıpke tızgen monşaqtai tızbelep jaza beruge bolar edı. Äitse de, onyŋ barlyǧyn bır maqala kölemıne syiǧyzu mümkın emes. Sondyqtan bız onyŋ eŋ bastylaryna ǧana toqtaldyq.
Keiıpkerımız ǧasyrǧa juyq tarihy bar ŪQK Şekara akademiiasynda qyzmet atqara jürıp, «leitenant» pogonynan «polkovnik» pogonyna deiın jetken qazaqtan şyqqan sanauly qyzdardyŋ bırı.
Juldyz Gizatovnanyŋ qyzmettık jolynda jeŋıstı, häm jemıstı sätterı jeterlık. 2011 jyly II därejelı «Şekara äskerlerınıŋ üzdıgı» belgısımen, ūlttyq qauıpsızdıktı qamtamasyz etudegı qyzmettık ıs-qimylda qol jetkızgen oŋ nätijelerı men mındetterın adal oryndaǧany üşın Qazaqstan Respublikasy ŪQK, Şekara qyzmetınıŋ jäne Şekara akademiiasy bastyǧymen jäne onyŋ orynbasarlarymen, fakultet, kafedra basşylyǧymen marapattalǧan.
Myqty käsıbi maman – ärqaşan da ūjymnyŋ maqtanyşy. Polkovnik hanymnan taǧlymdy bılımın alǧan kursanttary bügınde el qūrmetıne bölenıp, eŋbegınıŋ elenıp jürgenı öz aldyna bölek äŋgıme.
Öz ısıne janymen berılgen Juldyz Gizatovnamen qyzmet babynda jiı kezdesemız. Qyzmetınıŋ är minutyn jüielı paidalanuǧa, sabaǧyna tiianaqty daiyndaluǧa daǧdylanǧan jan. Özın-özı damytyp, ǧylym-bılımge äbden den qoiǧan közı aşyq, kökıregı oiau täjıribelı maman. Sonymen qatar, kafedra, fakultettıŋ, Şekara akademiiasynyŋ qoǧamdyq jūmystaryna da belsene at salysady. Öz salasy boiynşa bırneşe oqu-ädıstemelık dünielerdı jaryqqa şyǧaryp ülgergen ol otbasynda meiırımdı ana, adal jar.
Juldyz Gizatovna bolaşaq joldasy Marat Polatkaryevichpen Şekara akademiiasynyŋ qabyrǧasynda oqyp jürıp, örımdei jap-jas kursant kezınde tanysqan. Sol jyldary qos ǧaşyqtyŋ dostyǧy ülken mahabbatqa ūlasqan edı. Ölerdei ǧaşyq bolyp, örımdei jas qyzdy uysyna tüsırgen jas ofiser köp oilanbastan sūlu qyzǧa üilenuge ūsynys bıldırgen eken. Osylaişa otbasyn qūryp, altyn asyqtai ūl men kümıs qasyqtai qyz tärbielegen ata-anaǧa ainalǧan qos polkovnik, bügınde el maqtap ärı tamsandyrǧan ülgılı janūiaǧa ainalady. Osyndai ülken mahabbatqa toly qyzyq ömır jolyn naqyşyna keltıre äŋgımelep bergen näzık janymyz, özınıŋ şekaraşy mamandyǧyn taŋdaǧanyn maqtan tūtady. Bügınde küntızbelık äskeri qyzmet ötılı 25 jyl.
İä, eptılık pen qyraǧylyqty, öjettık pen qaisar mınezdı talap etetın äskeri salada qyzmet atqaru ekınıŋ bırınıŋ maŋdaiyna bere bermeitın baq dep bılemız. Olai bolsa, äskeri qyzmet pen ūstazdyqty qatar alyp jürgen näzık jandy polkovnik Juldyz Gizatovnany 8 nauryz – Halyqaralyq äielder merekesımen şyn jürekten qūttyqtai otyryp, qyzyǧy men qiyny qatar jüretın äskeri qyzmetıŋızge tolaǧai tabystar tıleimız.
Näzık jandy polkovnik hanym, köktem merekesı köŋılıŋızge tek şattyq syilasyn degımız keledı.
Janat Jabyrbekov,
QR ŪQK Şekara akademiiasynyŋ
baspasöz hatşysy
Ūqsas jaŋalyqtar
