الماتىدا كاسىپكەر باقىت يبراگيمگە تيەسىلى باعاسى 460,6 ميلليون تەڭگە بولاتىن ءزاۋلىم ساراي ساتىلىمعا شىعارىلدى، دەپ حابارلايدى "ادىرنا" ۇلتتىق پورتالى.
حابارلاندىرۋ e-qazyna.kz پورتالىندا جاريالانعان.
بۇل نىسان بىلتىر ناۋرىز ايىندا ومىردەن وتكەن كاسىپكەر باقىت يبراگيمگە تيەسىلى بولعان.
الماتى قالاسى مەملەكەتتىك اكتيۆتەر باسقارماسىنىڭ مالىمەتىنشە، ءۇي كوممۋنالدىق مەنشىككە قابىلدانىپ، الماتى قالاسىنىڭ كوممۋنالدىق ينفراقۇرىلىمدى دامىتۋ باسقارماسىنا بەكىتىلگەن.
جالپى اۋدانى 553,6 شارشى مەتر بولاتىن بۇل تۇرعىن ءۇي الماتى قالاسى، بوستاندىق اۋدانى، قارعالى ىقشاماۋدانى، 2-كوشە، 48-ءۇي مەكەنجايىندا ورنالاسقان. ۇيمەن بىرگە 0,14 گەكتار جەر تەلىمى جانە قوسالقى شارۋاشىلىق قۇرىلىستارى ساتىلادى. جالپى نىساننىڭ باعاسى – 460 ميلليون 630 مىڭ تەڭگە.
اۋكتسيون 5 ناۋرىزدا وتەدى. ساۋداعا قاتىسۋ ءۇشىن 69 ميلليون تەڭگەدەن استام كەپىلدىك جارنا تالاپ ەتىلەدى.
جاريالانعان سۋرەتتەر مەن قۇجاتتارعا سۇيەنسەك، ءۇي ەكى قاباتتى جانە جەرتولەسى بار. بولمەلەر سانى كورسەتىلمەگەن. عيمارات 2011 جىلى سالىنعان. اۋلادا باسسەين بار، ال گاراجدا بىرنەشە اۆتوكولىك تۇر.
زاڭعا سايكەس، بۇل جىلجىمايتىن مۇلىكتى ساتۋدان تۇسكەن قارجى جەرگىلىكتى بيۋدجەتكە باعىتتالادى.
ەسكە سالايىق، 2020 جىلدىڭ قاراشاسىندا Qazaq Banki-ءدىڭ بۇرىنعى اكتسيونەرى باقىت يبراگيم 8 جىلعا باس بوستاندىعىنان ايىرىلعان بولاتىن. ول Bank RBK-دان قاراجات جىمقىرۋ ءىسى بويىنشا سوتتالعان ەدى.
