اقىن ءحانبيبى ەسەنقاراقىزى بەلگىلى جازۋشى دۋلات يسابەكوۆتىڭ اسىندا مەملەكەتتىك سىيلىق سۇرادى دەپ جالعان اقپارات تاراتقانداردى سوتقا بەردى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، الەۋمەتتىك جەلىدە تاراعان جازبالار شىندىققا جاناسپايدى. اسىرەسە، جازۋشى قۇلبەك ەرگوبەكتىڭ ايتقاندارى اقىننىڭ ار-وجدانىنا نۇقسان كەلتىرگەن.
“سۇيەكشى-قۇلبەك” مەن تۋرالى: “دۋلات يسابەكوۆ ماقتاعان پروزالىق شىعارماما مەملەكەتتىك سىيلىق بەرمەدىڭىزدەر” دەپ قارا قازانداي وكپەسىن قارالى جۇرتتىڭ الدىنا اقتارا سالدى”، – دەدى ول.
اقىن ءوزىن قارالاعان جازبالار جەلىدە كەڭ تارالعانىن، ولاردىڭ استىنا كوپتەگەن ادامدار پىكىر قالدىرعانىن ايتتى. وسىعان بايلانىستى ول سوتقا جۇگىنىپ، ادىلدىك ىزدەيتىنىن جەتكىزدى.
“ماعان ءبىراز لاۋازىمدى، قۇرمەتتى ادامدار تەلەفون سوعىپ، “رامازان ايىندا ايتىسپا” دەپ باسۋ ايتقانمەن، مەنىڭ ار-وجدانىما تۇسكەن داقتى، جاپقان جالانى وزىمنەن وزگە ەشكىم قورعاي المايدى. سوت پروتسەسىندە اۆتورلار ءوز قاتەلىگىن مويىنداسا، ەكى جاقتى كەلىسىمگە (مەدياتسيا) كەلۋ مۇمكىندىگى بار”، – دەدى اقىن.
قازىر سوت پروتسەسى باستالعانى بەلگىلى بولدى. ەسەنقاراقىزى بۇل ءىستىڭ قالاي اياقتالاتىنى كوپشىلىكتىڭ ءادىل باعاسىنا بايلانىستى ەكەنىن اتاپ ءوتتى.
