بۇگىن، 4 ناۋرىزدا بريۋسسەلدە ەۋروپالىق كوميسسيانىڭ توراعاسى ۋرسۋلا فون دەر ليايەن جاڭا ReArm Europe قورعانىس جوسپارىن تانىستىردى. ونىڭ ايتۋىنشا، بۇل جوسپار ەۋروپالىق وداقتىڭ قورعانىسى مەن قاۋىپسىزدىگىن قامتاماسىز ەتۋگە دايىن ەكەنىن جانە ۋكرايناعا كومەك كورسەتۋ كولەمىن ارتتىرۋدى كوزدەيتىنىن كورسەتەدى، دەپ حابارلايدى “ادىرنا” ۇلتتىق پورتالى DW سايتىنا سىلتەپ.
«ءبىز قارۋلانۋدى قايتا كۇشەيتۋ داۋىرىندە ءومىر سۇرۋدەمىز. ەۋروپا ۋكراينانى قولداۋدان باستاپ، ءوز قاۋىپسىزدى ءۇشىن دە جاۋاپكەرشىلىكتى الۋ ماقساتىندا قورعانىسىنا شىعىندارىن ەداۋىر ارتتىرۋعا دايىن »، — دەپ مالىمدەدى ەۋروكوميسسيا توراعاسى جۋرناليستەرگە.
ونىڭ جوسپارى بەس نەگىزگى باعىتتى قامتيدى، ولاردىڭ ءبىرى - 150 ميلليارد ەۋرولىق جاڭا قور.
بۇل اۋە جانە زىمىراندىق قورعانىس، ارتيللەريالىق جۇيەلەر، زىمىران جانە وق-دارىلەر، ۇشقىشسىز ۇشاقتار مەن ۇشقىشسىز قورعانىس جۇيەلەرى، سونداي-اق كيبەرنەتيكادان اسكەري موبيلدىلىككە دەيىنگى باسقا قاجەتتىلىكتەر سياقتى قورعانىسقا ينۆەستيتسيالاۋ ءۇشىن قاجەت.
ەۋرووداق ەلدەرى قارىز الۋ ارقىلى ۋكرايناعا اسكەري تەحنيكا جەتكىزۋدى جەدەلدەتىپ، بىرلەسكەن ساتىپ الۋلار ارقىلى ءوز قورعانىسىن كۇشەيتە الادى.
«بۇل بىرلەسكەن ساتىپ الۋلار ارقىلى شىعىنداردى ازايتىپ، بولشەكتەنۋدى تومەندەتىپ، وپەراتسيالىق ۇيلەسىمدىلىكتى ارتتىرىپ، قورعانىس ونەركاسىپتىك بازامىزدى نىعايتادى»، — دەپ سەنىمدى تۇردە ايتتى ەۋروكوميسسيا باسشىسى.
جالپى العاندا، ءارتۇرلى قارجىلىق تۇتقالاردى پايدالانا وتىرىپ، ReArm Europe باعدارلاماسى ەۋروپانىڭ قاۋىپسىزدىگى مەن تۇراقتىلىعىن قامتاماسىز ەتۋ ءۇشىن شامامەن 800 ميلليارد ەۋرونى جۇمىلدىرۋعا قابىلەتتى، دەپ ەسەپتەدى ەۋروكوميسسيا.
فون دەر ليايەن ۇسىنىسىن 6 ناۋرىزدا ۋكرايناعا قولداۋ كورسەتۋ جونىندەگى ارنايى سامميت قارساڭىندا ەۋرووداق ەلدەرىنىڭ كوشباسشىلارىنا جىبەرگەن.
ەۋروكوميسسيا توراعاسىنىڭ ءسوز سويلەۋىنە بىرنەشە ساعات قالعاندا، اقش پرەزيدەنتى دونالد ترامپ ۋكرايناعا اسكەري كومەك جەتكىزۋدى بەلگىسىز مەرزىمگە توقتاتاتىنىن مالىمدەگەن بولاتىن.
