Bügın, 4 nauryzda Briusselde Europalyq komissiianyŋ töraǧasy Ursula fon der Liaien jaŋa ReArm Europe qorǧanys josparyn tanystyrdy. Onyŋ aituynşa, būl jospar Europalyq Odaqtyŋ qorǧanysy men qauıpsızdıgın qamtamasyz etuge daiyn ekenın jäne Ukrainaǧa kömek körsetu kölemın arttyrudy közdeitının körsetedı, dep habarlaidy “Adyrna” ūlttyq portaly DW saityna sıltep.
«Bız qarulanudy qaita küşeitu däuırınde ömır sürudemız. Europa Ukrainany qoldaudan bastap, öz qauıpsızdı üşın de jauapkerşılıktı alu maqsatynda qorǧanysyna şyǧyndaryn edäuır arttyruǧa daiyn », — dep mälımdedı Eurokomissiia töraǧasy jurnalisterge.
Onyŋ jospary bes negızgı baǧytty qamtidy, olardyŋ bırı - 150 milliard eurolyq jaŋa qor.
Būl äue jäne zymyrandyq qorǧanys, artilleriialyq jüieler, zymyran jäne oq-därıler, ūşqyşsyz ūşaqtar men ūşqyşsyz qorǧanys jüielerı, sondai-aq kibernetikadan äskeri mobildılıkke deiıngı basqa qajettılıkter siiaqty qorǧanysqa investisiialau üşın qajet.
Euroodaq elderı qaryz alu arqyly Ukrainaǧa äskeri tehnika jetkızudı jedeldetıp, bırlesken satyp alular arqyly öz qorǧanysyn küşeite alady.
«Būl bırlesken satyp alular arqyly şyǧyndardy azaityp, bölşektenudı tömendetıp, operasiialyq üilesımdılıktı arttyryp, qorǧanys önerkäsıptık bazamyzdy nyǧaitady», — dep senımdı türde aitty Eurokomissiia basşysy.
Jalpy alǧanda, ärtürlı qarjylyq tūtqalardy paidalana otyryp, ReArm Europe baǧdarlamasy Europanyŋ qauıpsızdıgı men tūraqtylyǧyn qamtamasyz etu üşın şamamen 800 milliard eurony jūmyldyruǧa qabılettı, dep eseptedı Eurokomissiia.
Fon der Liaien ūsynysyn 6 nauryzda Ukrainaǧa qoldau körsetu jönındegı arnaiy sammit qarsaŋynda Euroodaq elderınıŋ köşbasşylaryna jıbergen.
Eurokomissiia töraǧasynyŋ söz söileuıne bırneşe saǧat qalǧanda, AQŞ prezidentı Donald Tramp Ukrainaǧa äskeri kömek jetkızudı belgısız merzımge toqtatatynyn mälımdegen bolatyn.
