رينگ -ساحنا ورنىن باسا الا ما؟

3415
Adyrna.kz Telegram

ايتىس – قازاق ونەرىنىڭ قازىناسى. بۇگىندە ايتىس ءتۇرلى اتاۋلارمەن ۇيىمداستىرىلىپ، تەلەارنالار ارقىلى كورەرمەنگە ۇسىنىلىپ ءجۇر. جەكپە-جەك، الامان ايتىس، «التىن دومبىرا» ايتىسى… بۇلار – ايتىس ونەرىن جاڭعىرتۋعا باعىتتالعان ىزگى قادامدار. ايتىستىڭ جاڭاشىل بۇل تۇرلەرى قوعام نازارىن وزىنە اۋدارتا ءبىلدى. ال، 12 قىركۇيەك كۇنى ساعات 22.00-دە «31 ارنا» – «ايتىس الاڭى» تاقىرىبىمەن ايتىستىڭ جاڭا جوباسىن ۇسىندى. جۇرگىزۋشى بولات ءابدىلمانوۆ مۇنداي ايتىس ەلىمىزدە بۇرىن-سوڭدى بولماعانىن ايتتى. ايتىس الاڭى ەرەجەسىز جەكپە-جەك تۇرىنە ارنالعان سەگىز بۇرىشتى رينگ سەكىلدى بەزەندىرىلگەن. اقىندار وتىرعان ساحنا شارشى الاڭ ۇلگىسىمەن قىزىل جانە كوك بۇرىشقا نەگىزدەلىپ جاسالىپ، ارتقى جاعى تەمىر تورمەن قورشالعان. ستۋدياداعى كورەرمەندەر ايتىستى وسى تور ارقىلى تاماشالايدى. اقىندار ساحنادا ەمەس، رينگتىڭ ىشىندە تۇرعانداي كورىنەدى. نەگىزىنەن، شارشى الاڭ – قارسىلاستار بىلەك كۇشىن سىناسۋعا ارنالعان ورىن. جاڭاشىل ايتىستىڭ بىلىعى جۇرگىزۋشى بولات ءابدىلمانوۆ­تىڭ قازىلار القاسىن جانە اقىنداردى تانىستىرعاندا باستالدى.  مۇندايدى كورىپ پە ەدىڭىز؟ قازىلار القاسىن تانىستىرۋ سالتاناتىندا، سپورتتىق جارىستا تورەشىلەردى تانىستىرعانداي ايقايعا باسقاندا، ءاسانالى ءاشىموۆ  اقساقال كۇلكىگە ەرىك بەردى. ايتىستى تاماشالاپ وتىرعان كورەرمەندەر دە ەزۋلەرىن جيا الماعان بولار. شىنىندا، بۇل كۇلكىلى مە؟ ءيا، ءبىر ساتتىك كۇلكى بولىپ كورىنۋى مۇمكىن. ءوزىم بۇل ايتىستى ءتۇسىرىلىم كەزىندە دە، تەلەارنادان دا تاماشالادىم.  جۇرگىزۋشىنىڭ كىسى ەسىمدەرىن كەلەكە قىلعانى جانىما باتتى. قازاقتىڭ زاڭعار جازۋشىسى  مۇحتار اۋەزوۆتىڭ «ايتىس – قازاقتىڭ تەاترى» دەگەن ءتامسىلىن نەگە ۇمىتتىق؟ ايتىس ونەرىن سپورتقا تەلۋگە بولا ما؟ ۇلىق ونەرىمىزدى نەگە سپورتقا كىرىپتار ەتتىك؟ مەنى وسىنداي سۇراقتار مازالاپ، قولىما قالام العىزدى.

جوبانى ۇيىمداستىرۋشىلار ايتىسقا سپورتتىڭ كەيبىر ەلەمەنتتەرىن قوسۋ ارقىلى رەڭىن كەلتىرەمىز دەسە، قاتتى قاتەلەسەدى. سپورتتىڭ ەل نامىسى مەن دەنساۋلىق كەپىلى ەكەندىگىندە داۋ جوق. ايتىستىڭ سپورت، سپورتتىڭ ايتىس بولا المايتىنىن ەسكەرۋسىز قالدىردى. ايتىس الاڭى دەگەن تاماشا اتاۋدى سپورت الاڭىنا اينالدىرعانى قالاي؟ ايتىس جەڭىمپازىنا ەكى ميلليون تەڭگە سىياقى تاعايىندالعان. بۇل بەتىمىزبەن، بۇگىن سپورت الاڭىندا جۇرگەن اقىنداردى ەرتەڭ قانداي الاڭدا كورەتىنىمىزدى ءبىر قۇداي بىلەر. وسىلاي كەتە بەرسە، بولاشاقتا اقىنداردىڭ قوماقتى سىياقى ءۇشىن جىنويناققا تولى تۇنگى كلۋبتا نەمەسە باسقا جەرلەردە ايتىسا بەرمەيتىنىنە كىم كەپىلدىك بەرە الادى؟ ايتىستىڭ جاناشىرى بولۋعا ءتيىس ازاماتتاردىڭ مۇنداي باسسىزدىققا جول بەرگەنى قىنجىلتتى. عاسىرلاردان عاسىر­لارعا جالعاسىپ كەلە جاتقان ايتىسىمىزدىڭ تەرىس كەتۋىنە جاعداي جاساعانىن بايقاماي قالسا كەرەك. ايتىسكەرلەردىڭ ۇيىمداستىرۋشىلارعا تالاپ قويا المايتىنى،  ۇلت ۇپايىن تۇگەندەۋگە ءتيىس ەكەنىن ەسەپكە الماستان، جەتەككە ەرىپ كەتۋى قانداي وكىنىشتى! ۇستاعاننىڭ قولىندا، تىستەگەننىڭ اۋزىندا كەتە بەرەتىن جاعدايعا ايتىسكەرلەر قالاي جەتتى؟..

«حابار» ارناسى ۇيىمداستىرعان «شوۋ-ايتىس» از بولعانداي، «ايتىس الاڭى» القىمنان الدى. قاتەلىكتەن ساباق الار اقىندارىمىز قاتەلەرىن تۇزەۋگە اسىق ەمەس. قايتا، كۇشەيتىپ بارا جاتقانداي اسەر قالدىردى. كيەلى ونەرگە كىر كەلتىرەر مۇنداي بەرەكەسىز ايتىستىڭ ەلگە كەرەگى شامالى. «شىمشىق سويسا دا قاساپشى سويسىن» دەگەن ءتامسىلدى ەسكەرمەگەن ايتىسكەر­لەر ەلگە قالاي عيبرات ايتپاقشى؟ ايتىس ارقىلى سپورتقا جارناما جاساۋدىڭ ءجونى جوق. سپورتشىلار ونسىز دا وليمپيا­دالار مەن الەم بىرىنشىلىكتەرىندە، سونداي-اق، الەمدىك دەڭگەي­دەگى ەرەجەسىز جەكپە-جەكتەردە توپ جارىپ، ءوز ىستەرىنىڭ شەبەرى ەكەنىن دالەلدەپ، قازاق ەلىنىڭ مەرەيىن اسىرىپ ءجۇر. ولاردىڭ تەلەارنا ارقىلى ناسيحاتتالۋى از ەمەس. سوندىقتان، ايتىسكەر – ايتىسكەر بولىپ، سپورتشى – سپورتشى بولىپ، ءوز دارەجەسىندە قۇرمەت­تەلۋى ءتيىس. شوۋ كورسەتەمىز دەپ اسىرا سىلتەپ، ەكەۋىن ارالاستىرىپ، بوتقا جاساۋ­دىڭ قاجەتى شامالى. تەلەار­نالاردىڭ «ايتىس» ۇيىمداس­تىرعانى قۇپتارلىق ءىس. بىراق، وتكەننەن ساباق­تاستىقتى ۇزبەي بولاشاققا جول كورسەتەتىندەي ءمان-ماعى­ناسى بولۋ كەرەك. مەنىڭ پىكىرىمشە، كيەلى ونەردى كەلەكە ەتكەن بۇل جوبا توقتاتىلۋى ءتيىس. بولماسا، قايتا وزگەرتىلىپ، ساحنا ۇلگىسىندە جاسالعانى دۇرىس.


 

جاسۇلان ناۋرىءزالى،

قازۇۋ جۋرناليستيكا فاكۋلتەتىنىڭ 1-كۋرس ستۋدەنتى.

"الماتى اقشامى"

پىكىرلەر