اقمولا وبلىسىندا ورىن العان جول-كولىك وقيعاسىنان ءانشى ءارى اسابا اسقار دۇيسەنوۆ كوز جۇمدى، دەپ حابارلايدى "ادىرنا" ۇلتتىق پورتالى.
28 اقپاندا استانا – پەتروپاۆل تاسجولىنىڭ 31-ءشى شاقىرىمىندا "گازەل" مەن Volkswagen Polo ماركالى كولىكتەرى سوقتىعىسىپ، سالدارىنان جەڭىل اۆتوكولىك جۇرگىزۋشىسى، بەلگىلى ءانشى اسقار دۇيسەنوۆ قازا تاپقان.
قايعىلى حاباردى ەستىگەن ونەردەگى ارىپتەستەرى مەن جاقىندارى مارقۇمنىڭ وتباسىنا كوڭىل ايتۋدا. اسقار دۇيسەنوۆتى اقتىق ساپارعا شىعارىپ سالۋ ءراسىمى 2 ناۋرىز كۇنى ونىڭ تۋعان جەرى – سولتۇستىك قازاقستان وبلىسى، كىشكەنەكول اۋىلىندا وتەدى.
اقمولا وبلىستىق پوليتسيا دەپارتامەنتى جول اپاتىنا بايلانىستى سوتقا دەيىنگى تەرگەۋ باستالعانىن مالىمدەدى.
"قازىرگى ۋاقىتتا جول اپاتىنىڭ ءمان-جايى انىقتالۋدا. پروتسەستىك شەشىم قابىلداندى", – دەپ حابارلادى ۆەدومستۆو.
