شىعىس قازاقستان وبلىسىندا جاڭا تۋعان نارەستەنىڭ دەنەسى قوقىس كونتەينەرىنەن تابىلعان. وقيعا بويىنشا قىلمىستىق ءىس قوزعالىپ، كۇدىكتى رەتىندە 44 جاستاعى ايەل انىقتالدى، دەپ حابارلايدى “ادىرنا” ۇلتتىق پورتالى.
رەسمي دەرەكتەرگە سايكەس، ايەل 22 اقپان كۇنى كەشكى ساعات 20:00 شاماسىندا ۇيىندە جالعىز بوسانعانىن ايتقان. ونىڭ ايتۋىنشا، ءسابي ءومىر بەلگىلەرىنسىز دۇنيەگە كەلگەن. كەيىن نارەستەنى قوقىس جاشىگىنە اپارىپ تاستاعان.
تەرگەۋ بارىسىندا ايەلدىڭ جالدامالى پاتەردە تۇراتىنى جانە بۇعان دەيىن جۇكتىلىك بويىنشا ەسەپكە الىنباعانى بەلگىلى بولدى. ول 2024 جىلدىڭ ءساۋىر ايىندا مەديتسينالىق تەكسەرۋدەن وتكەن، بىراق دارىگەرلەرگە جۇكتىلىگى تۋرالى حابارلاماعان. ايەلدىڭ بەس بالاسى بار جانە پسيحونەۆرولوگيالىق ديسپانسەردە تىركەۋدە تۇرمايدى.
قازىرگى ۋاقىتتا قۇقىق قورعاۋ ورگاندارى وقيعانىڭ تولىق ءمان-جايىن انىقتاپ، تەرگەۋ امالدارىن جۇرگىزۋدە. سونىمەن قاتار، وبلىستىق دەنساۋلىق ساقتاۋ باسقارماسى قىزمەتتىك تەكسەرىس باستاعانىن حابارلادى. ايەل امبۋلاتورلىق باقىلاۋدا، جاعدايى قاناعاتتانارلىق.
