سەمەيدەگى №9 مەكتەپتىڭ ديرەكتورى باستاۋىش سىنىپ وقۋشىسىن جوعارى سىنىپ وقۋشىلارىنىڭ ۇرۋىنا بايلانىستى قىزمەتىنەن بوساتىلدى، دەپ حابارلايدى "ادىرنا" ۇلتتىق پورتالى.
اباي وبلىسىنىڭ ءبىلىم باسقارماسىنىڭ مالىمەتىنشە، تاربيە جۇمىسىنىڭ ناشار ۇيىمداستىرىلۋىنا بايلانىستى بىرقاتار مەكتەپ باسشىلارىنا تارتىپتىك شارالار قولدانىلعان.
№9 مەكتەپ ديرەكتورى قىزمەتىنەن بوساتىلسا، ونىڭ تاربيە ءىسى جونىندەگى ورىنباسارىنا قاتاڭ سوگىس جاريالانعان. №15 مەكتەپ پەن ش.ءۋاليحانوۆ اتىنداعى "جاس ۇلان" ليتسەي-ينتەرناتىنىڭ ديرەكتورلارىنا ەسكەرتۋ بەرىلگەن. سىنىپ جەتەكشىلەر مەن مەكتەپ پسيحولوگتارى دا جاۋاپكەرشىلىككە تارتىلعان.
قازاقستانداعى بالا قۇقىقتارى جونىندەگى ۋاكىل دينارا زاكيەۆا اباي وبلىسىنىڭ اكىمى بەرىك ۋاليمەن بۇل جاعدايدى تالقىلاعانىن ايتتى.
ونىڭ ايتۋىنشا، بالاعا شابۋىل جاساعان ەكى ءجاسوسپىرىمنىڭ اتا-انالارى بۇعان دەيىن كامەلەتكە تولماعاندار ءىسى جونىندەگى كوميسسيادا قارالعان، ويتكەنى ولار بالالارىن دۇرىس تاربيەلەمەۋ بويىنشا ەسەپكە الىنعان.
ەسكە سالا كەتەيىك، 24 اقپاندا الەۋمەتتىك جەلىدە ءبىر توپ مەكتەپ وقۋشىلارىنىڭ قورلانىپ، سوققىعا جىعىلعان قۇربىلارىنا قاتىگەزدىك تانىتقان ۆيدەو تاراعان بولاتىن.جان تۇرشىگەرلىك كادرلاردىڭ استىنداعى تۇسىنىكتەمەلەردە ۆيدەونىڭ سەمەي قالاسىندا، 343-ءشى اۋداندا تۇسىرىلگەنى ايتىلعان. جاسوسپىرىمدەردىڭ مەكتەپ وقۋشىسىن قاردا قالاي ۇرعانى، بارلىعىن ۆيدەوعا ءتۇسىرىپ العان. جازبالاردا ادەپسىز سوزدەر قولدانىلادى.
