Semeıdegi №9 mekteptiń dırektory bastaýysh synyp oqýshysyn joǵary synyp oqýshylarynyń urýyna baılanysty qyzmetinen bosatyldy, dep habarlaıdy "Adyrna" ulttyq portaly.
Abaı oblysynyń bilim basqarmasynyń málimetinshe, tárbıe jumysynyń nashar uıymdastyrylýyna baılanysty birqatar mektep basshylaryna tártiptik sharalar qoldanylǵan.
№9 mektep dırektory qyzmetinen bosatylsa, onyń tárbıe isi jónindegi orynbasaryna qatań sógis jarııalanǵan. №15 mektep pen Sh.Ýálıhanov atyndaǵy "Jas Ulan" lıeı-ınternatynyń dırektorlaryna eskertý berilgen. Synyp jetekshiler men mektep psıhologtary da jaýapkershilikke tartylǵan.
Qazaqstandaǵy bala quqyqtary jónindegi ýákil Dınara Zakıeva Abaı oblysynyń ákimi Berik Ýálımen bul jaǵdaıdy talqylaǵanyn aıtty.
Onyń aıtýynsha, balaǵa shabýyl jasaǵan eki jasóspirimniń ata-analary buǵan deıin kámeletke tolmaǵandar isi jónindegi komıssııada qaralǵan, óıtkeni olar balalaryn durys tárbıelemeý boıynsha esepke alynǵan.
Eske sala keteıik, 24 aqpanda áleýmettik jelide bir top mektep oqýshylarynyń qorlanyp, soqqyǵa jyǵylǵan qurbylaryna qatygezdik tanytqan vıdeo taraǵan bolatyn.Jan túrshigerlik kadrlardyń astyndaǵy túsiniktemelerde vıdeonyń Semeı qalasynda, 343-shi aýdanda túsirilgeni aıtylǵan. Jasóspirimderdiń mektep oqýshysyn qarda qalaı urǵany, barlyǵyn vıdeoǵa túsirip alǵan. Jazbalarda ádepsiz sózder qoldanylady.
