اتىراۋدا اتا-انالار جەكەمەنشىك مەكتەپتىڭ جابىلۋىنا بايلانىستى شۋ شىعاردى، دەپ حابارلايدى "ادىرنا" ۇلتتىق پورتالى 31-ارناعا سىلتەپ.
جارناماسى جەر جارعان ليتسەيدىڭ ليتسەنزياسىز جۇمىس ىستەگەنى انىقتالىپ، وقۋ ورنىنى جۇمىسىن توقتاتقان. ءبىر جىلدىق وقۋ اقىسىن الدىن الا تولەپ قويعان اتا-انالار قاراجاتتارىن قايتارا الماي ءجۇر.
الەۋمەتتىك جەلىلەردە مەكتەپتىڭ جارناماسى كەڭىنەن تاراعان. جارناماعا سايكەس، تاڭەرتەڭ ءبىلىم ورداسىنا كىرگەن وقۋشىلار كەشكى التىعا دەيىن ءتۇرلى ۇيىرمەلەرگە قاتىسىپ، شەت ءتىلىن ۇيرەنىپ، تاماق ءىشىپ، ءۇي تاپسىرماسىن ورىنداپ، جان-جاقتى ءبىلىم الۋى ءتيىس بولعان. وسى ۋادەلەرگە سەنگەن اتا-انالار بالالارىن مەكتەپكە بەرىپ، وقۋ اقىسىن تولىق تولەپ قويعان.
الايدا، وقۋ ورنى ەكى اي بۇرىن جۇمىسىن توقتاتقان. اتا-انالاردىڭ ايتۋىنشا، وقۋ اقىسى ءار بالاعا 700 مىڭنان 1 ميلليون تەڭگەگە دەيىن تولەنگەن.
جاۋاپتى دەپارتامەنت وكىلدەرىنىڭ ايتۋىنشا، مەكتەپ 2024 جىلدىڭ قىركۇيەگىندە اشىلىپ، 200-دەن استام بالانى قابىلداعان. بىراق، ليتسەنزياسىز جۇمىس ىستەگەندىكتەن، ونىڭ قىزمەتى توقتاتىلعان.
"مەملەكەتتىك ليتسەنزياسىز ءبىلىم بەرۋ قىزمەتىمەن اينالىسۋعا بولمايدى. بۇل مەكتەپ ليتسەنزيا الۋ ءۇشىن بىردە-ءبىر رەت ءوتىنىش تۇسىرمەگەن. ءبىز ليتسەنزياسىز جۇمىس ىستەپ جاتقاندارىن انىقتاپ، ءىس ماتەريالدارىن جيناقتاپ، مامانداندىرىلعان اكىمشىلىك سوتقا جولدادىق. اتا-انالار مەكتەپپەن جاسالعان شارتقا سايكەس، ازاماتتىق كودەكس بويىنشا سوتقا جۇگىنە الادى", – دەدى اتىراۋ وبلىسى ءبىلىم سالاسىنداعى ساپانى قامتاماسىز ەتۋ دەپارتامەنتىنىڭ باسشىسى بەردىكبەك تايشەۆ.
مەكتەپ باسشىلىعى اتا-انالاردىڭ اقشاسىن تولىق قايتاراتىنىن جازباشا تۇردە حابارلاعان. ال پوليتسيا "الاياقتىق" بابى بويىنشا تەرگەۋدى باستادى.
