«قازسپەتسەكسپورت» ەلەكتروندى اۋكتسيوندا اپاتقا ۇشىراعان ان-26 ۇشاعىنىڭ سىنىقتارىن ساتۋعا لوت جاريالادى، دەپ حابارلايدى “ادىرنا” ۇلتتىق پورتالى CMN.KZ سايتىنا سىلتەپ.
اقپاراتقا سايكەس، اۋكتسيون 10 اقپاندا شىعارىلدى. 26 اقپاندا ان-26 ۇشاقتارىنىڭ قاڭقاسىن ساتۋ بويىنشا اۋكتسيون وتەدى. بۇل رەتتە ساتۋعا ءبىر قاتىسۋشىعا رۇقسات ەتىلەدى. اۋكتسيونعا قاتىسۋ ءۇشىن ساتىپ الۋشى دەپوزيتكە 810 897 تەڭگە سالۋى كەرەك. ۇشاق سىنىقتارىنىڭ باستاپقى باعاسى 1,3 ملن تەڭگەدەن باستالادى.
سىنىقتاردىڭ سالماعى 14,6 مىڭ كگ قۇرايدى. ۇشاقتىڭ قالدىقتارى الماتى وبلىسى بورالداي اۋىلىندا، قر ۇقك اۆياتسيالىق قىزمەتىنىڭ بازاسىندا ورنالاسقان. العاشىندا اكتيۆتىڭ باعاسى 5 405 979 تەڭگە دەپ باعالاندى. ۇشاق 1978 جىلى شىعارىلعان جانە زاۋىتتىق ءنومىرى №72-01 (02).
فوتو: e-auction.e-qazyna.kz
باسىلىم مالىمەتىنشە، ساتىپ الۋشى ساتۋشىعا ساتىلىم باعاسىنان 15% كوميسسيالىق تولەم تولەۋگە مىندەتتى. سونىمەن قاتار، جاڭا يەسى ۇشاقتىڭ سىنىقتارىن ساتۋشىنىڭ اۆياتسيالىق قىزمەتكە كىرۋگە رۇقسات جىبەرگەن كۇننەن باستاپ 30 جۇمىس كۇنى ىشىندە الىپ كەتۋى قاجەت.
ودان بولەك، ۇشاقتىڭ سىنىقتارىمەن بىرگە، باعالاۋشىلار ۇشاقتىڭ الدىڭعى دوڭگەلەكتەرىن دە تەكسەرىپ، ولاردىڭ قۇنىن 29 948 تەڭگە دەپ باعالاعان.
فوتو: e-auction.e-qazyna.kz
قر تجم مالىمەتى بويىنشا، 13 ناۋرىزدا ساعات 17:22-دە استانا – الماتى باعىتىنداعى اسكەري ان-26 ۇشاعى راداردان جوعالىپ كەتكەن. ول الماتى اۋەجايىندا، ۇشىپ-قونۋ جولاعىنان بىرنەشە ءجۇز مەتر جەردە قۇلاعان. اۋەجايدىڭ ءباسپاسوز قىزمەتى ۇشاقتىڭ ورتەنگەنىن اۋەجايعا جاقىنداعاندا بايقاعان.ۇشاقتىڭ بورتىندا التى ادام بولعان، ولاردىڭ تورتەۋى سول جەردە قازا تاپتى:
- مايور عابيت بارلىقباەۆ، 1984 ج.ت. – اۆياتسيالىق ءبولىمنىڭ شتۋرمانى;
- كاپيتان دوسجان بايمۇراتوۆ، 1985 ج.ت. – ۇشاق توبىنىڭ تەحنيكالىق قىزمەتكەرى;
- اعا لەيتەنانت مۇحتار ساعىمباەۆ، 1994 ج.ت. – ەكيپاجدىڭ شتۋرمانى;
- سەرجانت ەۆگەني ۆاسيلكوۆ، 1985 ج.ت. – ۇشاق توبىنىڭ اعا مەحانيگى.
ەكى ەكيپاج مۇشەسى اۋرۋحاناعا جاتقىزىلدى، ءبىرىنىڭ دەنەسىنىڭ 50%-ى كۇيىك شالعاگ، ەكىنشىسى 30%-ى كۇيىپ قالعان. سونىمەن قاتار، ەكەۋىنىڭ دە بىرنەشە جاراقاتتارى مەن سىنۋى تىركەلگەن. 95 كۇننەن كەيىن، 2021 جىلعى 18 ماۋسىمدا، ەكەۋى دە اۋرۋحانادان شىعارىلدى.
كەيىننەن ۇشاقتىڭ قازاقستان رەسپۋبليكاسى ۇقك اۆياتسيالىق قىزمەتىنە تيەسىلى ەكەنى بەلگىلى بولدى. ان-26 ۇشاعىنىڭ بورتتىق ءنومىرى 02 بولعان، بۇل ءنومىر اپات ورنىنا تۇسىرىلگەن بارلىق بەينەمازمۇن مەن سۋرەتتەردە ايقىن كورىنەدى. سول سياقتى، ۇشاقتىڭ سىنىقتارىندا دا ءدال سونداي ءنومىر بەينەلەنگەن. بۇل سىنىقتار مەن ۇشاقتىڭ اپاتقا ۇشىراعان بولىكتەرى بىردەي ەكەنى انىق. مۇمكىن، بۇل الماتىداعى اپاتقا ۇشىراعان، اۆياتسيالىق قىزمەتتىڭ ءتورت قىزمەتكەرىنىڭ ءومىرىن قيعان ۇشاقتىڭ ءوزى بولۋى مۇمكىن.
CMN.KZ رەداكتسياسى قر ۇقك-نە سۇراۋ جىبەردى.
