«Qazspeseksport» elektrondy auksionda apatqa ūşyraǧan AN-26 ūşaǧynyŋ synyqtaryn satuǧa lot jariialady, dep habarlaidy “Adyrna” ūlttyq portaly CMN.KZ saityna sıltep.
Aqparatqa säikes, auksion 10 aqpanda şyǧaryldy. 26 aqpanda AN-26 ūşaqtarynyŋ qaŋqasyn satu boiynşa auksion ötedı. Būl rette satuǧa bır qatysuşyǧa rūqsat etıledı. Auksionǧa qatysu üşın satyp aluşy depozitke 810 897 teŋge saluy kerek. Ūşaq synyqtarynyŋ bastapqy baǧasy 1,3 mln teŋgeden bastalady.
Synyqtardyŋ salmaǧy 14,6 myŋ kg qūraidy. Ūşaqtyŋ qaldyqtary Almaty oblysy Boraldai auylynda, QR ŪQK aviasiialyq qyzmetınıŋ bazasynda ornalasqan. Alǧaşynda aktivtıŋ baǧasy 5 405 979 teŋge dep baǧalandy. Ūşaq 1978 jyly şyǧarylǧan jäne zauyttyq nömırı №72-01 (02).
Foto: e-auction.e-qazyna.kz
Basylym mälımetınşe, satyp aluşy satuşyǧa satylym baǧasynan 15% komissiialyq tölem töleuge mındettı. Sonymen qatar, jaŋa iesı ūşaqtyŋ synyqtaryn satuşynyŋ aviasiialyq qyzmetke kıruge rūqsat jıbergen künnen bastap 30 jūmys künı ışınde alyp ketuı qajet.
Odan bölek, ūşaqtyŋ synyqtarymen bırge, baǧalauşylar ūşaqtyŋ aldyŋǧy döŋgelekterın de tekserıp, olardyŋ qūnyn 29 948 teŋge dep baǧalaǧan.
Foto: e-auction.e-qazyna.kz
QR TJM mälımetı boiynşa, 13 nauryzda saǧat 17:22-de Astana – Almaty baǧytyndaǧy äskeri AN-26 ūşaǧy radardan joǧalyp ketken. Ol Almaty äuejaiynda, ūşyp-qonu jolaǧynan bırneşe jüz metr jerde qūlaǧan. Äuejaidyŋ baspasöz qyzmetı ūşaqtyŋ örtengenın äuejaiǧa jaqyndaǧanda baiqaǧan.Ūşaqtyŋ bortynda alty adam bolǧan, olardyŋ törteuı sol jerde qaza tapty:
- Maior Ǧabit Barlyqbaev, 1984 j.t. – aviasiialyq bölımnıŋ şturmany;
- Kapitan Dosjan Baimūratov, 1985 j.t. – ūşaq tobynyŋ tehnikalyq qyzmetkerı;
- Aǧa leitenant Mūhtar Saǧymbaev, 1994 j.t. – ekipajdyŋ şturmany;
- Serjant Evgenii Vasilkov, 1985 j.t. – ūşaq tobynyŋ aǧa mehanigı.
Ekı ekipaj müşesı auruhanaǧa jatqyzyldy, bırınıŋ denesınıŋ 50%-y küiık şalǧag, ekınşısı 30%-y küiıp qalǧan. Sonymen qatar, ekeuınıŋ de bırneşe jaraqattary men synuy tırkelgen. 95 künnen keiın, 2021 jylǧy 18 mausymda, ekeuı de auruhanadan şyǧaryldy.
Keiınnen ūşaqtyŋ Qazaqstan Respublikasy ŪQK aviasiialyq qyzmetıne tiesılı ekenı belgılı boldy. AN-26 ūşaǧynyŋ borttyq nömırı 02 bolǧan, būl nömır apat ornyna tüsırılgen barlyq beinemazmūn men suretterde aiqyn körınedı. Sol siiaqty, ūşaqtyŋ synyqtarynda da däl sondai nömır beinelengen. Būl synyqtar men ūşaqtyŋ apatqa ūşyraǧan bölıkterı bırdei ekenı anyq. Mümkın, būl Almatydaǧy apatqa ūşyraǧan, aviasiialyq qyzmettıŋ tört qyzmetkerınıŋ ömırın qiǧan ūşaqtyŋ özı boluy mümkın.
CMN.KZ redaksiiasy QR ŪQK-ne sūrau jıberdı.
