بۇگىن، 25 اقپان - قازاق حالقى ءۇشىن ۇمىتىلماس داتا. ويتكەنى، 1938 جىلى 25 اقپانعا قاراعان ءتۇنى نكۆد قازاق قايراتكەرلەرىن قىرىپ سالدى.
ولار قاماۋداعى 39 ادامدى ءبىر دەمدە اتتى. ولاردىڭ 14-ءى – سوۆەتتىك قازاقستان ۇكىمەتىنىڭ مۇشەلەرى ەدى…
1937 جىلدىڭ تامىزىنان 1938 جىلدىڭ 25 اقپانىنا دەيىن نكۆد تۇرمەسىندە وتىرعان قازاقتىڭ العاشقى جوعارى ءبىلىمدى اسكەري دارىگەرلەرىنىڭ جانە قازاقستانداعى تاريح عىلىمىنىڭ نەگىزىن قالاۋشىلاردىڭ ءبىرى سانجار اسفەندياروۆ تا بۇل قاتاردا اتىلدى.
ناقاق جالامەن 1937 جىلدىڭ 24 قىركۇيەگى كۇنى قاماۋعا الىنعان ساكەن سەيفۋللينگە «ۇلتشىل بۋرجۋا» دەگەن ايىپ تاعىلىپ، 1938 جىلى 25 اقپاندا الماتى نكۆد-سىنىڭ قابىرعاسىندا اتىلدى. كەيىن ستالين قايتىس بولعاننان كەيىن 1957 جىلى اقتالعان.
قۇدايبەرگەن جۇبانوۆ اتىشۋلى 58-باپتىڭ 2, 8, 9, جانە 11-تارماقتارى بويىنشا ايىپتالعان. ەڭ الدىمەن ءبىرىنشى باپ (58-2) بويىنشا «جاپون جانسىزى» رەتىندە كىنا تاققان. ونداعىسى عالىمنىڭ جاپون تىلىنە قىزىعۋشىلىعىنان بولەك، 10-نان استام ءتىلدى بىلەتىندىگى سەبەپ. الايدا 58-8 باپ (تەررورلىق) ايىپتالىپ، ءولىم جازاسىنا كەسىلگەن ۇكىم شىعارىلىپ، 1938 جىلدىڭ 25 اقپانىندا اتىلعان. 1957 جىلى 3 قازاندا سسرو جوعارعى سوتى اسكەري القاسىنىڭ شەشىمىمەن اقتالدى.
25 اقپاندا اتىلعان 39 ادام قاتارىندا جوعارىدا اتالعانداردان بولەك، ازاتتىق كۇرەسكەرلەرى، سوۆەت وكىمەتىنىڭ مەملەكەت، عىلىم، مادەنيەت، ادەبيەت قايراتكەرلەرى عابدولحاكىم بوكەيحانوۆ، شاكىر ديۆەەۆ، سۇلەيمەن ەسقاراەۆ، تەل جامانمۇرىنوۆ، تەمىربەك جۇرگەنوۆ، ۇزاقباي قۇلىمبەتوۆ، ءىزمۇحان قۇرامىسوۆ، سەيىتقالي مەڭدەشەۆ، ءىلياس مولداجانوۆ، حاسەن نۇرمۇحامەدوۆ، قابىلبەك سارىمولداەۆ، جانايدار سادۋاقاسوۆ، جاعىپار سۇلتانبەكوۆ، نىعمەتوللا سىرعابەكوۆ، قايسار ءتاشتيتوۆ، عابباس توعجانوۆ، ميراسبەك تولەپوۆ، زەينوللا تورەعوجين شەيىت بولدى.
توپتاپ اتۋ ناۋقانى تەك 25 اقپاندا عانا بولعان جوق. 25 اقپاندا جوعارىدا اتالعان 39 ادام اتىلسا، 26 اقپاندا 37 ادامدى اتتى. ونىڭ ىشىندە ءى.جانسۇگىروۆ، ج.شانين جانە ت.ب. قوعام قايراتكەرلەرى بار. 27 اقپاندا - 41 ادام، 28 اقپاندا - 40 ادام جانە ت.ب. بۇل ءتىزىم وسىلاي 14 ناۋرىزعا دەيىن جالعاسقان.
26 اقپاندا اتىلعانداردىڭ اراسىندا بەيىمبەت مايلين دە بار. ول 1937 جىلى جازىقسىز تۇتقىندالىپ، قىزىل قىرعىن ساياسي رەپرەسسيانىڭ كەسىرىنەن 1938 جىلدىڭ 26 اقپانىندا سۇراۋسىز اتىلدى. بەيىمبەتتىڭ ءومىرى مەن شىعارماشىلىعىن جان-جاقتى زەرتتەگەن توقتار بەيىسقۇلوۆتىڭ كورسەتۋىنشە، ايگىلى جازۋشىنى ايىپتايتىن سوت وتىرىسى 26 اقپاندا 12.30-دا باستالىپ، 12.45-تە اياقتالعان. ۇلتتىق ادەبيەت كلاسسيگىنىڭ ءومىرىن جالعىز وققا بايلاعان ءۇش-اق ادامنىڭ شەشىمىنە نەبارى 15 مينۋت ۋاقىت كەتكەن.
