بۇگىن، 24 اقپاندا استانادا قازاقستان رەسپۋبليكاسىنىڭ پرەمەر-ءمينيسترى ولجاس بەكتەنوۆ پەن العاشقى رەسمي ساپارىمەن كەلگەن قىرعىز رەسپۋبليكاسى مينيسترلەر كابينەتىنىڭ توراعاسى – پرەزيدەنت اكىمشىلىگىنىڭ باسشىسى ادىلبەك قاسىماليەۆ شاعىن جانە كەڭەيتىلگەن قۇرامدا كەلىسسوزدەر جۇرگىزدى، دەپ حابارلايدى «ادىرنا» ءتىلشىسى.
تاراپتار قازاقستان پرەزيدەنتى قاسىم-جومارت توقاەۆ پەن قىرعىزستان پرەزيدەنتى سادىر جاپاروۆ اراسىندا قول جەتكىزىلگەن ۋاعدالاستىقتاردىڭ جۇزەگە اسىرىلۋ بارىسىن قارادى. وندا ساۋدا-ەكونوميكالىق، ينۆەستيتسيالىق، ترانزيتتىك-كولىك، سۋ-ەنەرگەتيكالىق، تۋريستىك، مادەني-گۋمانيتارلىق ىنتىماقتاستىق، سونداي-اق اوك-كە قاتىستى ماسەلەلەردىڭ كەڭ اۋقىمى قامتىلدى.
«مەملەكەت باسشىلارىمىزدىڭ ءوزارا سەنىم مەن شىنايى دوستىق رۋحىنداعى تۇراقتى بايلانىستارى ءبىزدىڭ كوپقىرلى قاتىناستارىمىزدى جاڭا بەلەستەرگە كوتەرۋگە ىقپال ەتتى. ساۋدا بايلانىستارىن نىعايتۋ جانە تەرەڭدەتۋ ەكى ەل ەكونوميكاسىنىڭ دامۋىنا مۋلتيپليكاتيۆتى اسەر ەتەدى. وتكەن جىلدىڭ قورىتىندىسى بويىنشا ءوزارا ساۋدا كورسەتكىشتەرى تاعى دا ارتىپ، $1,7 ملرد-تى قۇرادى. سونىمەن قاتار ءبىز ساۋدا-ەكونوميكالىق ءوزارا ءىس-قيمىلدى ودان ءارى كەڭەيتۋ ءۇشىن ايتارلىقتاي الەۋەتتى كورىپ وتىرمىز»، — دەپ اتاپ ءوتتى ولجاس بەكتەنوۆ.
كەلىسسوزدەر بارىسىندا الەۋەتتى اشۋ جانە تاۋار اينالىمىن ارتتىرۋ تەتىكتەرى تالقىلاندى.
ترانزيتتىك-كولىك سالاسىندا قازاق-قىرعىز شەكاراسىنىڭ وتكىزۋ قابىلەتىن ارتتىرۋ بويىنشا كەشەندى شارالار ىسكە اسىرىلۋدا. شەكارادا «اقسۋ» – «كامىشانوۆكا» جانە «بەساعاش» – «كيچي-كاپكا» بەكەتتەرى سياقتى اۆتوموبيل وتكىزۋ پۋنكتتەرىن جاڭعىرتۋ جانە كەڭەيتۋ جۇمىستارى جۇرگىزىلۋدە. سونداي-اق «سورتوبە» – «توكموك» جانە «اۋقاتتى» – «كەن-بۋلۋن» وتكىزۋ بەكەتتەرىن دامىتۋ جوسپارلانعان.
سۋ-ەنەرگەتيكا سالاسىنداعى ىنتىماقتاستىققا ەرەكشە كوڭىل بولىنەدى. شۋ جانە تالاس وزەندەرى بويىندا ۆەگەتاتسيالىق كەزەڭدە سۋمەن قامتاماسىز ەتۋ، كيروۆ سۋ قويماسىن قاۋىپسىز پايدالانۋ جانە وڭىرلىك ەنەرگەتيكالىق قاۋىپسىزدىك ماسەلەلەرى تالقىلاندى.
تۋريزم – ءوزارا ءتيىمدى ىنتىماقتاستىقتىڭ ماڭىزدى باعىتى. جاڭا تۋريستىك باعىتتاردى دامىتۋ شارالارى ونىڭ ىشىندە، ترانسشەكارالىق ەكو-باعىتتار قۇرۋ، بەلسەندى تۋريزم ءۇشىن ينفراقۇرىلىمدى دامىتۋ جانە قوناق ءۇي بيزنەسىنە ينۆەستيتسيالار تارتۋ ماسەلەلەرى تالقىلاندى.
مادەني-گۋمانيتارلىق ىنتىماقتاستىق جەلىسى بويىنشا بيىل قىرعىزستاندا قازاق كينوسى كۇندەرىن وتكىزۋ جوسپارلانعان، سونداي-اق قىرعىزستان اۋماعىندا قازاقستاندىق جوعارى وقۋ ورىندارىنىڭ فيليالدارىن اشۋ ماسەلەلەرى پىسىقتالۋدا.
كەلىسسوزدەر قورىتىندىسى بويىنشا پرەمەر-مينيستر ولجاس بەكتەنوۆ قازاقستان ۇكىمەتى قازاق-قىرعىز ساۋدا-ەكونوميكالىق ارىپتەستىگىنىڭ جوعارى سەرپىنىن قولداۋعا دايىن ەكەنىن اتاپ ءوتتى.
