اباي وبلىسىنىڭ اكىمى بەرىك ءۋالي وڭىردەگى سۋ تاسقىنى قاۋپى بار ايماقتاردى تىكۇشاقپەن ارالاپ شىقتى. بۇل تۋرالى بۇگىن، 24 اقپاندا وبلىس اكىمدىگىنىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«تىكۇشاقپەن بارلاۋ بارىسىندا ءشۇلبى سۋ ەلەكتر ستانتسياسىنداعى گيدرولوگيالىق جاعدايعا، كوكتەمدە ەرتىس پەن ۋبا وزەندەرىندەگى سۋ دەڭگەيى كوتەرىلەتىن قاۋىپتى ورىندارعا دەن قويىلدى. مۇز جارۋ جۇمىسى جۇرگىزىلگەن ەلدى مەكەندەر دە نازاردان تىس قالمادى. ايماق باسشىسى بورودۋليحا اۋدانىنداعى كراسنىي يار، پەرەمەنوۆكا اۋىلدارى مەن جەزكەنت كەنتى اۋماعىنداعى قار دەڭگەيىن اۋەدەن باقىلادى. اتالعان ەلدى مەكەندەر ماڭىندا جىل سايىن مۇز جارۋ جۇمىسى جۇرگىزىلەدى. ويتكەنى گيدروقۇرىلىمدار جاقىن ورنالاسقان»،—دەلىنگەن حابارلامادا.
اباي وبلىسى اكىمىنىڭ ورىنباسارى ديميتري گاريكوۆ وزەندەردە مۇز جارۋ جۇمىسىن جۇرگىزۋگە دايىندىق بارىسى دا تەكسەرىلگەنىن مالىمدەدى.
«وبلىستىڭ باسقا دا اۋداندارىنداعى تاسقىن قاۋپى بار ەلدى مەكەندەردى تۇراقتى باقىلاۋدا ۇستاپ وتىرمىز. كۇندەلىكتى مونيتورينگ جۇرگىزەمىز. ايماق باسشىسىنا وڭىردەگى احۋالدى تولىق باياندادىم»،—دەدى ول.
ەكى اۋدان مەن وبلىس ورتالىعىنداعى گيدرولوگيالىق جاعدايدى باعامداعان وبلىس اكىمى وزەندەردەگى سۋ دەڭگەيىن، وڭىردەگى بارلىق سۋ بوگەندەرىن، سۋ وتكىزۋ قۇرىلعىلارىن ءجىتى باقىلاۋدا ۇستاۋدى تاپسىردى.
«الداعى ۋاقىتتا بەسقاراعاي اۋدانىنىڭ جەتىجار، كريۆينكا اۋىلدارى مەن سەمەي قالاسى اۋماعىنداعى ەرتىس وزەنىندە مۇز جارۋ جۇمىسى جۇرگىزىلەدى. بۇل جۇمىستى جالعاستىرۋ قاجەت. جاقىن ارادا بەسقاراعاي، ءۇرجار، ماقانشى، اقسۋات اۋداندارىنا بارىپ، سۋ تاسقىنىنا دايىندىق بارىسىن كورەمىن. قازىرگى تاڭدا وڭىردەگى احۋال تۇراقتى»، — دەدى وبلىس اكىمى.
<
