Abaı oblysynyń ákimi Berik Ýálı óńirdegi sý tasqyny qaýpi bar aımaqtardy tikushaqpen aralap shyqty. Bul týraly búgin, 24 aqpanda oblys ákimdiginiń baspasóz qyzmeti jazdy, dep habarlaıdy «Adyrna» tilshisi.
«Tikushaqpen barlaý barysynda Shúlbi sý elektr stanııasyndaǵy gıdrologııalyq jaǵdaıǵa, kóktemde Ertis pen Ýba ózenderindegi sý deńgeıi kóteriletin qaýipti oryndarǵa den qoıyldy. Muz jarý jumysy júrgizilgen eldi mekender de nazardan tys qalmady. Aımaq basshysy Borodýlıha aýdanyndaǵy Krasnyı Iar, Peremenovka aýyldary men Jezkent kenti aýmaǵyndaǵy qar deńgeıin áýeden baqylady. Atalǵan eldi mekender mańynda jyl saıyn muz jarý jumysy júrgiziledi. Óıtkeni gıdroqurylymdar jaqyn ornalasqan»,—delingen habarlamada.
Abaı oblysy ákiminiń orynbasary Dımıtrıı Garıkov ózenderde muz jarý jumysyn júrgizýge daıyndyq barysy da tekserilgenin málimdedi.
«Oblystyń basqa da aýdandaryndaǵy tasqyn qaýpi bar eldi mekenderdi turaqty baqylaýda ustap otyrmyz. Kúndelikti monıtorıng júrgizemiz. Aımaq basshysyna óńirdegi ahýaldy tolyq baıandadym»,—dedi ol.
Eki aýdan men oblys ortalyǵyndaǵy gıdrologııalyq jaǵdaıdy baǵamdaǵan oblys ákimi ózenderdegi sý deńgeıin, óńirdegi barlyq sý bógenderin, sý ótkizý qurylǵylaryn jiti baqylaýda ustaýdy tapsyrdy.
«Aldaǵy ýaqytta Besqaraǵaı aýdanynyń Jetijar, Krıvınka aýyldary men Semeı qalasy aýmaǵyndaǵy Ertis ózeninde muz jarý jumysy júrgiziledi. Bul jumysty jalǵastyrý qajet. Jaqyn arada Besqaraǵaı, Úrjar, Maqanshy, Aqsýat aýdandaryna baryp, sý tasqynyna daıyndyq barysyn kóremin. Qazirgi tańda óńirdegi ahýal turaqty», — dedi oblys ákimi.
<
