ءماجىلىس دەپۋتاتى ەرمۇرات باپي قازاقستاننىڭ كاسپي قۇبىر كونسورتسيۋمىنا (كقك) جاسالعان شابۋىل ءۇشىن ۋكراينادان وتەماقى تالاپ ەتۋىنە مورالدىق تا، زاڭدىق تا قۇقىعى جوق ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
«قازاقستان وتەماقى تالاپ ەتۋى كەرەك دەگەنمەن مەن تۇبەگەيلى كەلىسپەيمىن. بىزدە ونداي تالاپ قويۋعا مورالدىق تا، زاڭدىق تا نەگىز جوق. ۋكراينا ءۇش جىلدان استام ۋاقىتتان بەرى باسقىنشى تاراپپەن ءوز تاۋەلسىزدىگى مەن حالقىن قورعاۋ ءۇشىن قاسيەتتى كۇرەس جۇرگىزىپ كەلەدى. وسى سوعىس اياسىندا ۋكراينا ءوز ەلىن، جەرىن قورعاۋ ءۇشىن قاجەتتى تاكتيكا مەن ستراتەگيانى تاڭداۋعا تولىق قۇقىلى»، – دەدى دەپۋتات.
ونىڭ ايتۋىنشا، كقك – رەسەي اۋماعىندا ورنالاسقان ينفراقۇرىلىمدىق نىسان، سوندىقتان ول باسقىنشى ەلدىڭ اسكەري ينفراقۇرىلىمىنىڭ ءبىر بولىگىنە اينالعان.
«وعان جاسالعان سوققى – قازاقستانعا قارسى باعىتتالعان شابۋىل ەمەس، سوعىس جاعدايىنداعى قاجەتتىلىك. ۋكراينا ءۇشىنشى ەلدەرگە زيان تيگىزۋدى كوزدەپ وتىرعان جوق، تەك ءوز مەملەكەتتىگىن قورعاۋدا»، – دەدى باپي.
دەپۋتات قازاقستاننىڭ كقك شابۋىلىنان 300 ميلليارد تەڭگە شىعىنعا ۇشىراعانى تۋرالى مالىمەتكە كۇمان كەلتىرىپ، بۇل سوما نەگىزسىز بولۋى مۇمكىن ەكەنىن ايتتى. ونىڭ پىكىرىنشە، ناقتى شىعىن قۇبىر ۇزاق ۋاقىت بويى جۇمىس ىستەمەگەن جاعدايدا عانا تۋىنداۋى مۇمكىن، ال بۇعان ۋكراينا ەمەس، قازاقستاننىڭ مۇناي-گاز ەكسپورتىنىڭ بالاما باعىتتارىن الدىن الا قامتاماسىز ەتپەگەن جاۋاپتى تۇلعالار كىنالى.
«رەسەيگە تاۋەلدىلىكتى ارتتىرۋ – "ەسكى قازاقستان" وكىلدەرىنىڭ ستراتەگيالىق قاتەلىگى. رەسەي – تەك كسرو-نى عانا ەمەس، 1939 جىلعى ريببەنتروپ-مولوتوۆ پاكتىسى نەگىزىندە يمپەريانى قالپىنا كەلتىرۋدى كوزدەيتىن اگرەسسيۆتى سىرتقى ساياساتى بار ەل ەكەنىن الدىن الا ءتۇسىنۋ كەرەك ەدى»، – دەپ تولىقتىردى دەپۋتات.
ايتا كەتەيىك، 17 اقپاندا كاسپي قۇبىر كونسورتسيۋمىنىڭ (كقك) «كروپوتكينسكايا» مۇناي ايداۋ ستانتسياسى جەتى دروننىڭ شابۋىلىنا ۇشىراعان بولاتىن. بۇل قۇبىر ارقىلى قازاقستان مۇنايى دا ەكسپورتتالادى.
