Májilis depýtaty Ermurat Bapı Qazaqstannyń Kaspıı qubyr konsorıýmyna (KQK) jasalǵan shabýyl úshin Ýkraınadan ótemaqy talap etýine moraldyq ta, zańdyq ta quqyǵy joq ekenin málimdedi, dep habarlaıdy "Adyrna" ulttyq portaly.
«Qazaqstan ótemaqy talap etýi kerek degenmen men túbegeıli kelispeımin. Bizde ondaı talap qoıýǵa moraldyq ta, zańdyq ta negiz joq. Ýkraına úsh jyldan astam ýaqyttan beri basqynshy tarappen óz táýelsizdigi men halqyn qorǵaý úshin qasıetti kúres júrgizip keledi. Osy soǵys aıasynda Ýkraına óz elin, jerin qorǵaý úshin qajetti taktıka men strategııany tańdaýǵa tolyq quqyly», – dedi depýtat.
Onyń aıtýynsha, KQK – Reseı aýmaǵynda ornalasqan ınfraqurylymdyq nysan, sondyqtan ol basqynshy eldiń áskerı ınfraqurylymynyń bir bóligine aınalǵan.
«Oǵan jasalǵan soqqy – Qazaqstanǵa qarsy baǵyttalǵan shabýyl emes, soǵys jaǵdaıyndaǵy qajettilik. Ýkraına úshinshi elderge zııan tıgizýdi kózdep otyrǵan joq, tek óz memlekettigin qorǵaýda», – dedi Bapı.
Depýtat Qazaqstannyń KQK shabýylynan 300 mıllıard teńge shyǵynǵa ushyraǵany týraly málimetke kúmán keltirip, bul soma negizsiz bolýy múmkin ekenin aıtty. Onyń pikirinshe, naqty shyǵyn qubyr uzaq ýaqyt boıy jumys istemegen jaǵdaıda ǵana týyndaýy múmkin, al buǵan Ýkraına emes, Qazaqstannyń munaı-gaz eksportynyń balama baǵyttaryn aldyn ala qamtamasyz etpegen jaýapty tulǵalar kináli.
«Reseıge táýeldilikti arttyrý – "Eski Qazaqstan" ókilderiniń strategııalyq qateligi. Reseı – tek KSRO-ny ǵana emes, 1939 jylǵy Rıbbentrop-Molotov paktisi negizinde ımperııany qalpyna keltirýdi kózdeıtin agressıvti syrtqy saıasaty bar el ekenin aldyn ala túsiný kerek edi», – dep tolyqtyrdy depýtat.
Aıta keteıik, 17 aqpanda Kaspıı qubyr konsorıýmynyń (KQK) «Kropotkınskaıa» munaı aıdaý stanııasy jeti dronnyń shabýylyna ushyraǵan bolatyn. Bul qubyr arqyly Qazaqstan munaıy da eksporttalady.
