فرانتسيانىڭ شىعىسىنداعى ميۋلۋز قالاسىندا كونگونى قولداۋعا ارنالعان دەمونستراتسيا كەزىندە شابۋىل جاسالىپ، ءبىر ادام قازا تاپتى، ەكى پوليتسيا قىزمەتكەرى اۋىر جاراقات الدى، دەپ حابارلايدى "ادىرنا" ۇلتتىق پورتالى BBC-گە سىلتەمە جاساپ.
وقيعا ورنىندا 37 جاستاعى الجيرلىك ازاماتى ۇستالعان. ول ءبىر پوليتسەيدى – موينىنان، ەكىنشىسىن – كەۋدەسىنەن پىشاقتاعان. ال وعان توسقاۋىل بولۋعا تىرىسقان ازامات پىشاق جاراقاتىنان كوز جۇمدى.
كۋاگەرلەردىڭ ايتۋىنشا، كۇدىكتى شابۋىل كەزىندە «اللاحۋاكبار» دەپ ايقايلاعان. فرانتسيا پروكۋراتۋراسى بۇل وقيعاعا تەرروريزم بابى بويىنشا تەرگەۋ باستاعانىن مالىمدەدى.
جەرگىلىكتى پروكۋروردىڭ مالىمەتىنشە، قىلمىسكەر تەرروريزمگە كۇدىكتىلەر تىزىمىندە بولعان جانە ونى ەلدەن دەپورتاتسيالاۋ تۋرالى شەشىم قابىلدانعان.
پرەزيدەنت ەممانۋەل ماكرون بۇل وقيعانىڭ «يسلاميستىك تەراكت ەكەنىنە ەش كۇمان جوق» دەپ مالىمدەدى.
ماكرون قازا تاپقان ادامنىڭ وتباسىنا كوڭىل ايتىپ، فرانتسيا ۇكىمەتىنىڭ تەرروريزممەن كۇرەستى جالعاستىراتىنىن باسا ايتتى.
فرانتسيا پرەمەر-ءمينيسترى فرانسۋا بايرۋ X الەۋمەتتىك جەلىسىندە وقيعا قاتىستى پىكىرىن جازدى.
«فاناتيزم تاعى دا سوققى جاسادى، ءبىز قايعىرىپ وتىرمىز»، – دەدى ول
