Şyǧys Qazaqstan oblysy Altai qalasynda 31 jastaǧy buhgalter Angelina Hon öz-özıne qol jūmsady. Marqūmnyŋ tuystary onyŋ jūmysynda qysym körgenın jäne 3,5 million teŋgenıŋ jetıspeuşılıgı üşın aiyptalǧanyn aitady, dep habarlaidy “Adyrna” ūlttyq portaly.
Qazırgı taŋda “Özın-özı öltıruge itermeleu” baby boiynşa qylmystyq ıs qozǧalyp, tergeu bastaldy.
Angelinanyŋ anasy Roza Hon qyzynyŋ “Dostyq” meiramhanasynda jūmys ıstegenın jäne soŋǧy ekı aida qatty küizelıske tüskenın mälımdedı. Onyŋ aituynşa, qyzyna basşylyq tarapynan qysym körsetılgen, ärıptesterı de oǧan qarsy qoiylǧan.
Marqūmnyŋ tuystary meiramhananyŋ iesı – käsıpker Mūrat Sailaubaev pen onyŋ äielı Madişa Sailaubaeva jūmysty qiyndatyp, qyzmetkerlerge ülken jauapkerşılık jüktegenın aitady. Angelina bastapqyda kassir bolyp jūmys ıstep, keiın buhgalter retınde auystyrylǧan. 2024 jyldyŋ qaraşa aiynda mekemede tekseru jürgızılıp, 3,5 million teŋge jetıspeuşılık anyqtalǧan. Osydan keiın basşylyq onyŋ moinyna qaryz ılıp, moraldyq qysym körsetkenın aitady.
Anasynyŋ aituynşa, qyzy jūmystan ketkısı kelgenımen, “şyǧa almaimyn, öitkenı olar menı kınälı dep oilaidy” dep aitqan. 27 qaŋtarda, tuǧan künınde, bastyǧy ony jeke kabinetke qamap, aiqailap, kemsıtken. Osy oqiǧadan keiın Angelina ömırımen qoştasuǧa şeşım qabyldaǧan.
Onyŋ soŋǧy hattary tabylyp, olarda otbasy müşelerınen keşırım sūrap, öz ömırıne tüsken auyrtpalyqty kötere almaǧanyn jazǧan. Būrynǧy küieuıne hat qaldyryp, ony älı de jaqsy köretının moiyndaǧan.
Qazırgı uaqytta ŞQO polisiia departamentı būl ıs boiynşa tergeu jürgızıp jatyr. Tuystary ädıldık talap etıp, kınälılerdıŋ jauapqa tartyluyn sūraidy. Al käsıpker Mūrat Sailaubaev pen onyŋ äielı būl oqiǧaǧa qatysty resmi tüsınıkteme bermegen. Jurnalister de bailanysqa şyqqanymen, eşqandai jauap ala almaǧan.
Marqūmnyŋ jaqyndary “Angelinanyŋ atyna kır keltırmeu jäne ädıl tergeu jürgızu” üşın küresetının mälımdedı.
Ūqsas jaŋalyqtar
