جەتىسۋ وبلىسىنىڭ كەربۇلاق اۋدانىندا رۋدنيچنىي گەس-1 جانە گەس-2 قۇرىلىسىن باستاۋ جوسپارلانىپ وتىر، دەپ حابارلايدى “ادىرنا” ۇلتتىق پورتالى.
الايدا بۇل جوبا قوعامدا ۇلكەن پىكىرتالاس تۋعىزدى. عالىمدار، ەكولوگتار جانە قوعامدىق ۇيىم وكىلدەرى قۇرىلىس ايماقتىڭ ەكولوگياسىنا زيان تيگىزۋى مۇمكىن ەكەنىن ايتىپ، الاڭداۋشىلىق بىلدىرۋدە.
قۇرىلىسقا قارسى شىققان “پەتروگليفتەردى قورعاۋشىلار” قوعامدىق قورىنىڭ اتقارۋشى ديرەكتورى ولگا گۋميروۆا گەس سالۋ كەزىندە وزەن ارناسى وزگەرىپ، ەجەلگى قونىستار، قورىمدار مەن قولا ءداۋىرىنىڭ جارتاستاعى سۋرەتتەرى جويىلىپ كەتۋى مۇمكىن ەكەنىن مالىمدەدى.
ەكولوگ سەرگەي كۋراتوۆ بۇل اۋماقتىڭ سەل جانە سەيسميكالىق قاۋىپى جوعارى ەكەنىن اتاپ ءوتتى. ونىڭ ايتۋىنشا، جوبا بويىنشا ۇسىنىلعان قۇجاتتاردا سانيتارلىق-قورعاۋ ايماعىنىڭ ولشەمدەرى، قورشاعان ورتاعا اسەر ەتۋ دەڭگەيى جانە ەلەكتر ەنەرگياسىن تاسىمالداۋ جولدارى تۋرالى ناقتى اقپارات جوق.
ال وبلىس اكىمدىگى بۇل الاڭداۋشىلىقپەن كەلىسپەيدى. ولاردىڭ مالىمەتىنشە، جوبا بارلىق ەكولوگيالىق تالاپتارعا ساي ازىرلەنىپ، 2020-2030 جىلدارعا ارنالعان قازاقستان رەسپۋبليكاسىنىڭ گيدروەنەرگەتيكا سالاسىن دامىتۋ جوسپارىنا ەنگىزىلگەن.
جەتىسۋ وبلىسىنىڭ تابيعي رەسۋرستار جانە تابيعاتتى پايدالانۋ باسقارماسى 2024 جىلعى 2 ساۋىردە جوبانىڭ مەملەكەتتىك ەكولوگيالىق ساراپتاماسىن ماقۇلداعان. اكىمدىكتىڭ مالىمەتىنشە، قوعامدىق تىڭداۋلار ۇيىمداستىرىلىپ، قۇرىلىس ورنىنىڭ ارحەولوگيالىق زەرتتەۋى ءۇشىن ارنايى بايقاۋ جاريالانعان.
سونداي-اق، جوباعا 45 ملرد تەڭگە ينۆەستيتسيا تارتىلىپ، 600-دەن استام جاڭا جۇمىس ورنى اشىلاتىنى حابارلاندى.
قازىرگى ۋاقىتتا قۇرىلىس ءالى باستالعان جوق. اكىمدىك وكىلدەرىنىڭ ايتۋىنشا، رۋدنيچنىي جانە كوكسۋ اۋىلدارىنىڭ تۇرعىندارى جوبانى قولدايدى، ال قۇرىلىس اياقتالعان سوڭ جەردى رەكۋلتيۆاتسيالاۋ جانە كوگالداندىرۋ جۇمىستارى جۇرگىزىلەدى.
