ەڭبەك قاۋىپسىزدىگىن ساقتاۋ – قىزمەتكەرلەردىڭ دەنساۋلىعى مەن ءومىرىن قورعاۋعا باعىتتالعان ماڭىزدى شارالار. ەلدەگى بارلىق كاسىپورىندار ەڭبەك جاعدايلارىن جاقسارتۋ ءۇشىن جۇمىس ىستەۋى قاجەت. وكىنىشكە قاراي، ەلىمىزدە وندىرىستىك جاراقاتتار، ادام ولىمىنە اكەپ سوقتىراتىن جازاتايىم وقيعالار تىيىلماي تۇر. كۇنى كەشە ۇلىتاۋ وبلىسىنداعى كەنىشتە بولعان اپات وسىعان ناقتى دالەل. مەملەكەت باسشىسى «قازاقمىس» كورپوراتسياسىنا قاراستى كەنىشتە ورىن العان قايعىلى وقيعاعا بايلانىستى ەڭبەك قاۋىپسىزدىگى سالاسىندا قاتاڭ ساقتالۋعا ءتيىس جاعدايلارعا نازار اۋداردى. پرەزيدەنت قاسىم-جومارت توقاەۆ نىسانداردىڭ قاۋىپسىزدىك جۇيەسىمەن جابدىقتالۋ دەڭگەيى وتە تومەن ەكەندىگىن ايتتى.
«SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى الماتى فيليالىنىڭ توراعاسى الماس نەسىپقاليەۆ ەڭبەك قاۋىپسىزدىگىنە قاتىستى ءوز پىكىرلەرىمەن ءبولىستى.
«قازاقمىس» كومپانياسىنداعى قايعىلى جاعداي ەل ونەركاسىبىندەگى قاۋىپسىزدىك جۇيەسىنىڭ ءالسىز ەكەندىگىن كورسەتتى. بۇل تۋرالى ماماندار ۇنەمى ايتىپ تا جازىپ تا ءجۇر. جالپى تەك ءوندىرىس سالاسى عانا ەمەس، كەز كەلگەن مەكەمەدە ەڭبەك قاۋىپسىزدىگىنە قاتىستى ءتۇرلى ماسەلەلەردىڭ تۋىندايتىنى راس. وسى ورايدا كاسىپوداق ۇيىمىنىڭ نەگىزگى اتقاراتىن قىزمەتى - جۇمىسكەرلەردىڭ ەڭبەك جانە الەۋمەتتىك قۇقىعىن قورعاۋ، ەڭبەك قاۋىپسىزدىگىنىڭ ساقتالۋىن قاداعالاۋ. سوندىقتان دا ەڭبەك زاڭدىلىعى، قاۋىپسىزدىك تالاپتارى بۇزىلىپ جاتسا، جۇمىسكەرلەرگە قول ۇشىن بەرەتىن دە وسى كاسىپوداق ۇيىمدارى. لايىقتى ەڭبەكاقى، قاۋىپسىز جۇمىس ورنىمەن قامتۋ ماسەلەسىن ۋشىقتىرماي ۋاقىتىندا شەشۋ دە وڭاي شارۋا ەمەس. بۇل رەتتە ءبىز جاڭا شەشىمدەر قابىلداپ جاتىرمىز. سونىڭ ەڭ باستىسى - ەڭبەككەرلەردىڭ ءبىلىمىن ارتتىرۋ. «Senim» سالالىق كاسىپتىك وداعى ەڭبەك قاۋىپسىزدىگىن ساقتاۋ، كاسىپوداق مۇشەلەرىنىڭ قۇقىعىن قورعاۋ ماقساتىنا تۇراقتى تۇردە ءتۇرلى ءىس-شارالار وتكىزەدى. ماسەلەن، 2024 جىلى 1050 دەن استام كاسىپوداق مۇشەلەرى «كەلىسىم كوميسسياسى»، «ەڭبەك كودەكسى بويىنشا وزگەرىس» تاقىرىپتارى بويىنشا ارنايى كۋرس وقىدى. ەڭبەكتى قورعاۋ جانە قاۋىپسىزدىك تەحنيكاسى جونىندەگى تەحنيكالىق ينسپەكتورلاردى وقىتۋ تۇراقتى جۇرگىزىلەدى»، - دەدى ول.
الماس نەسىپقاليەۆتىڭ ايتۋىنشا، وندىرىستىك جاراقات الۋدان قورعاۋ ماقساتىندا بارلىق مەكەمەلەردە وندىرىستىك كەڭەستەر بەلسەندى جۇمىس ىستەۋى ءتيىس، سونىمەن قاتار تەحنيكالىق ينسپەكتورلاردىڭ جۇمىسىن كۇشەيتۋ قاجەت.
«2024 جىلى ءبىزدىڭ كاسىپوداققا قاتىستى ۇيىمداردا وندىرىستىك جاراقاتتانۋدىڭ 12 جاعدايى تىركەلدى، جاراقاتتانۋدىڭ نەگىزگى ۇلەسى جەدەل مەديتسينالىق جاردەم قىزمەتىنە تيەسىلى: جول كولىگى وقيعالارى، قۇلاۋ، پاتسيەنتتەردىڭ مەديتسينالىق قىزمەتكەرلەرگە وزدەرىنىڭ فۋنكتسيونالدىق مىندەتتەرىن ورىنداۋ كەزىندە شابۋىل جاساۋى. كاسىپوداق ءوز تاراپىنان جاراقات العان كاسىپوداق مۇشەلەرىن قورعاۋ ماقساتىندا، ەڭبەك ينسپەكتسياسىمەن بىرلەسە وتىرىپ شەشۋگە ات سالىستى. كاسىپوداق مۇشەلەرىنىڭ جۇمىس بەرۋشىلەرى ءوز قىزمەتكەرلەرىنىڭ ومىرلەرىنە قاۋىپ تونبەيتىندەي جاعداي جاساۋعا مىندەتتەلگەن. مەموراندۋم شەڭبەرىندە كاسىپوداق مۇشەلەرىنە زاڭ كومەگى كورسەتىلدى، ماسەلەلەردى سوتقا دەيىنگى رەتتەۋدە كەلىسىمگە قول جەتكىزىلدى، سونداي-اق سوتتا مۇددەلەر ءبىلدىرۋ، ار-نامىس پەن قادىر-قاسيەتتى قورعاۋ ماسەلەلەرى بويىنشا ادۆوكات ۇسىنىلدى. وسىنىڭ ناتەجەسىندە زاڭسىز جۇمىستان شاعارىلعان 10 كاسىپوداقتىڭ مۇشەسى جۇمىسقا قايتا قابىلداندى. مەملەكەت باسشىسى اتاپ كورسەتكەندەي، ەڭبەك قاۋىپسىزدىگىن نىعايتۋ ءۇشىن بار كۇش-جىگەرىمىزدى سالۋىمىز قاجەت. وتانىمىزدىڭ يگىلىگى ءۇشىن ەڭبەك ەتىپ جۇرگەن جۇمىسكەرلەردىڭ قۇقىعىن قورعاۋدا بىزگە دارمەنسىزدىك تانىتۋعا بولمايدى»، - دەدى ول.
الماس نەسىپقاليەۆ ەڭبەك قاۋىپسىزدىگىنىڭ نەگىزگى قاعيدالارىنا قاتىستى بىرنەشە ۇسىنىس ايتتى.
«بىرىنشىدەن، بىزگە قاۋىپسىزدىكتىڭ زاماناۋي جۇيەلەرىنە كوشۋ قاجەت. بۇعان ارينە تسيفرلاندىرۋ قىزمەتتەرى كىرەدى. جاھاندىق تسيفرلاندىرۋ زامانىندا بىزگە جاڭاشىلدىق قاجەت. ءاربىر مەكەمە، زاۋىت، فابريكا، مەيلى ەمحانا بولسىن، ەڭبەك جاعدايلارىن جاقسارتۋعا باعىتتالعان قاۋىپسىزدىك ەرەجەلەرىن ساقتاۋى ءتيىس. ەكىنشىدەن، جۇمىسشىلاردىڭ ءبىلىمى مەن بىلىكتىلىگىن ۇزدىكسىز ارتتىرۋ وزەكتى. قاۋىپسىزدىك بويىنشا تۇراقتى وقىتۋ مەن ترەنينگتەر وتكىزۋ - جۇمىسكەرلەردىڭ جاراقات الۋ قاۋپىن ازايتادى. ونىڭ ىشىنە قورعانىس قۇرالدارىن قولدانۋدى ۇيرەتۋ بار. قاۋىپ-قاتەردى الدىن الا انىقتاۋ جانە باعالاۋ دا ماڭىزدى. بۇل قاۋىپتى فاكتورلاردى دەر كەزىندە انىقتاۋعا سەپتىگىن تيگىزەدى، سونىڭ ارقاسىندا وندىرىستىك جاراقاتتاردىڭ الدىن الۋعا، ەڭ باستىسى، ادام ءولىمىنىڭ الدىن الۋعا بولادى»، - دەپ وي تۇيىندەدى ول.
