وزبەكستان 9 مامىر، ياعني ەسكە الۋ مەن قۇرمەت كۇنىنە وراي، ەكىنشى دۇنيەجۇزىلىك سوعىس ارداگەرلەرىنە 10 مىڭ دوللار بەرمەك. بۇل تۋرالى وزبەكستان پرەزيدەنتى شاۆكات ميرزيوەۆتىڭ جارلىعى پرەزيدەنتتىڭ رەسمي سايتىندا جاريالاندى، دەپ حابارلايدى “ادىرنا” ۇلتتىق پورتپلى.
جاۋاپتى مينيسترلىكتەر مەن ۆەدومستۆولارعا ەكىنشى دۇنيەجۇزىلىك سوعىسقا قاتىسۋشىلارمەن تەڭەستىرىلگەن ازاماتتارعا 25 ميلليون سۋم (شامامەن 1930 دوللار) بەرۋ تاپسىرىلعان.
سونىمەن قاتار، سوعىس جىلدارىندا مايداندا ەڭبەك ەتكەن جۇمىسشىلارعا 9 مامىرعا دەيىن 3 ميلليون سۋم (شامامەن 230 دوللار) بەرىلەدى.
جارلىق بويىنشا، ارداگەرلەردى ىنتالاندىرۋعا بايلانىستى بارلىق شىعىندار رەسپۋبليكالىق بيۋدجەت ەسەبىنەن وتەلەدى.
ميرزيەەۆ «ەكىنشى دۇنيەجۇزىلىك سوعىس جەڭىسىنىڭ 80 جىلدىعىن جانە ەسكە الۋ پەن قۇرمەت كۇنىنە ارنالعان شارالاردى ۇيىمداستىرۋ تۋرالى» قاۋلىعا قول قويدى. قۇجاتتا وزبەكستاندا بۇل كۇننىڭ كەڭىنەن اتاپ وتىلەتىنى، سوعىس پەن ەڭبەك ارداگەرلەرىنە، سونداي-اق تاۋەلسىزدىك جىلدارىندا قىزمەتتىك بورىشىن ورىنداۋ كەزىندە قازا تاپقان اسكەري قىزمەتكەرلەر مەن قۇقىق قورعاۋشىلارعا ەرەكشە قۇرمەت كورسەتىلەتىنى ايتىلعان.
وزبەكستاننان ەكىنشى دۇنيەجۇزىلىك سوعىسقا شامامەن 2 ميلليون ادام اتتانعان، ولاردىڭ 538 مىڭنان استامى قازا تاپقان، تاعى 158 مىڭنان استامى حابارسىز كەتكەن. رەسپۋبليكا تاريحىندا 200-گە جۋىق اسكەري قىزمەتكەر مەن قۇقىق قورعاۋشى وتانىنىڭ قورعانى ءۇشىن ءوز ومىرلەرىن قيعان.
«ءبىز ارقاشان جۇرەگىمىزدە اكەلەرىمىز بەن اتالارىمىزدىڭ شەكسىز باتىلدىعىن، توزىمدىلىگىن جانە جانقيارلىعىن، سونداي-اق بەيبىتشىلىك پەن تاۋەلسىزدىك ءۇشىن ءوز ومىرلەرىن قيعان ەر جۇرەك ۇلداردى ساقتايتىن بولامىز»، — دەلىنگەن قاۋلىدا.
9 مامىردا بۇكىل ەل بويىنشا مەرەكەلىك ءىس-شارالار مەن ارداگەرلەردى قۇرمەتتەۋ ۇيىمداستىرىلادى.
ۇكىمەتكە 1941-1945 جىلدارداعى سوعىس قاتىسۋشىلارىنا باسقا قولداۋ شارالارىن كورسەتۋ تاپسىرىلدى. ولاردىڭ ىشىندە جالعىز باستى جانە از قامتىلعان ارداگەرلەردىڭ تۇراتىن جەرلەرىن جوندەۋ جانە اباتتاندىرۋ جۇمىستارىن جۇرگىزۋ، تۇراقتى تۇردە مەديتسينالىق كومەك كورسەتۋ قىزمەتىن ۇيىمداستىرۋ، ءبىر قولداۋشىسى بار ساناتوريلەرگە تەگىن جولدامالار بەرۋ دە بار.
قۇجاتقا سايكەس، ەكىنشى دۇنيەجۇزىلىك سوعىستىڭ قاتىسۋشىلارى مەن ەڭبەك مايدانى ارداگەرلەرىنە جەڭىستىڭ 80 جىلدىعىنا ارنالعان مەرەيتويلىق مەدالدار تاپسىرىلادى.
پرەزيدەنت قورعانىس مينيسترلىگىنە تاشكەنت قالاسى اكىمدىگىمەن بىرلەسىپ، 9 مامىردا مەرەكەلىك سالەمدەسۋ مەن وتشاشۋ ۇيىمداستىرۋدى تاپسىردى.
وتكەن جىلى وزبەكستاندا ەكىنشى دۇنيەجۇزىلىك سوعىس قاتىسۋشىسىنا 18 ميلليون سۋم (شامامەن 1,6 مىڭ دوللار) تولەنگەن. 2023 جىلعى مالىمەتتەر بويىنشا رەسپۋبليكادا 174 ارداگەر تۇرعان، 2024 جىلدىڭ مامىرىنا قاراي ولاردىڭ سانى 112 ادامعا دەيىن قىسقارعان.
ال قازاقستاندا بىلتىر رەسپۋبليكا بويىنشا بىرجولعى الەۋمەتتىك كومەكتىڭ ورتاشا مولشەرى 1,5 ملن تەڭگەنى قۇرادى. بۇل رەتتە كوپتەگەن وڭىردە ورتاشا مولشەردەن جوعارى سوما تولەندى. اتاپ ايتقاندا، اقمولا وبلىسىندا – 3 ملن تەڭگە، اقتوبە وبلىسىندا – 2 ملن تەڭگەدەن استام. اباي، الماتى، قاراعاندى، پاۆلودار وبلىستارى مەن استانا جانە الماتى قالالارىندا ءىى دۇنيەجۇزىلىك سوعىس قاتىسۋشىلارى 2 ملن تەڭگەدەن الدى.
2024 دىلى ەل اۋماعىندا 148 سوعىس ارداگەرى بولدى. ەكىنشى دۇنيەجۇزىلىك سوعىس قاتىسۋشىلارىنا الەۋمەتتىك قولداۋدان بولەك، اي سايىن 16 اەك (2024 جىلى 59 072 تەڭگە) مولشەرىندە ارناۋلى مەملەكەتتىك جاردەماقى تولەنەدى.
