اقش پرەزيدەنتى دونالد ترامپ ۋكراينا باسشىسى ۆلاديمير زەلەنسكيدى سوعىستى تەز ارادا توقتاتۋعا شاقىرىپ، ونى سايلاۋ وتكىزۋدەن باس تارتقانى ءۇشىن ايىپتادى، دەپ حابارلايدى "ادىرنا" ۇلتتىق پورتالى.
ترامپتىڭ ايتۋىنشا، زەلەنسكي تەك "مىقتى كوميك" رەتىندە تانىلعان جانە ونىڭ ۋكرايناداعى رەيتينگى 4% عانا. ول زەلەنسكيدىڭ اقش-تى جەڭۋ مۇمكىن ەمەس سوعىسقا 350 ميلليارد دوللار جۇمساۋعا كوندىرگەنىن سىناپ، بۇل سوما ەۋروپانىڭ قارجىلاي قولداۋىنان 200 ميلليارد دوللارعا ارتىق ەكەنىن ايتتى. سونىمەن قاتار، اقش بۇل قاراجاتقا ەشقانداي كەپىلدىك الماعانىن العا تارتتى.
ترامپ ۋكراينا باسشىسىن بولىنگەن قاراجاتتىڭ ءبىر بولىگىن جوعالتىپ جىبەردى دەپ ايىپتاپ، سايلاۋ وتكىزبەي، بيلىكتە قالۋ ءۇشىن ءتۇرلى ايلا قولدانعانىن جەتكىزدى. ونىڭ پىكىرىنشە، ۋكراينا باسشىسى رەسەيمەن بەيبىت كەلىسسوزدەر جۇرگىزۋگە قارسى ارەكەت ەتۋدە.
"سايلانباعان ديكتاتور زەلەنسكي تەز ارەكەت ەتۋى كەرەك، ايتپەسە ونىڭ ەلىنەن تۇك قالمايدى. بۇل ارادا ءبىز رەسەيمەن سوعىستى توقتاتۋ تۋرالى ءساتتى كەلىسسوزدەر جۇرگىزىپ جاتىرمىز. سەبەبى ءبارى مۇنى تەك ترامپ پەن ترامپ اكىمشىلىگى جاساي الاتىنىن مويىندايدى", – دەدى ول.
تاسس مالىمەتىنشە، زەلەنسكي ترامپتىڭ ايىپتاۋلارىن جوققا شىعاردى. ۋكراينادا جۇرگىزىلگەن الەۋمەتتىك ساۋالناماعا سايكەس، ەل تۇرعىندارىنىڭ 57%-ى وعان سەنىم بىلدىرەدى. زەلەنسكي ترامپتىڭ ۋكراينانى ساۋد ارابياسىنداعى كەلىسسوزدەرگە قاتىستىرماعانىن سىنعا الدى جانە ونىڭ رەسەي تاراپىنان تاراعان جالعان اقپاراتقا سەنگەنىن ايتتى.
ترامپتىڭ بۇل مالىمدەمەلەرى ەۋروپادا، اسىرەسە گەرمانيادا الاڭداۋشىلىق تۋدىردى. گەرمانيا كانتسلەرى ولاف شولتس اقش-تىڭ كەلىسسوزدەردەگى ۇستانىمىن وزگەرتكەنىن مالىمدەپ، ۋكراينا بۇل پروتسەستىڭ نەگىزگى قاتىسۋشىسى بولۋى كەرەك ەكەنىن ايتتى.
اقش-تىڭ ۆيتسە-پرەزيدەنتى دجەي دي ۆەنس زەلەنسكيگە ترامپپەن قوعامدىق قاقتىعىستاردان ساقتانۋعا كەڭەس بەردى، سەبەبى بۇل جاعدايدى ودان ءارى شيەلەنىستىرىپ جىبەرۋى مۇمكىن. سونىمەن قاتار، كيەۆكە ترامپتىڭ ارنايى وكىلى كيت كەللوگ كەلدى، بۇل ماسەلەنىڭ اقش ءۇشىن ماڭىزدىلىعىن كورسەتەدى.
ايتا كەتەيىك، بۇعان دەيىن رەسەي پرەزيدەنتى ۆلاديمير پۋتين ترامپپەن كەزدەسۋگە دايىن ەكەنىن مالىمدەگەن ەدى.
