تاراز قالاسىندا بۇرىن ورتالىق بازار ورنالاسقان جەردە مەرەيتويلىق سالتاناتتار كۇنى رەسپۋبليكالىق ماڭىزى بار تاريحي ەسكەرتكىش - «كونە تاراز» ارحەولوگيالىق ساياباعىنىڭ اشىلۋى وتەدى، دەپ حابارلادى قازاقپارات ءتىلشىسى جامبىل وبلىسى اكىمدىگىنىڭ ىشكى ساياسات باسقارماسىنا سىلتەمە جاساپ.
ەسكە سالا كەتەيىك، 2011 جىلى تاراز ورتالىق بازارى باسقا جەرگە كوشىرىلىپ، ونىڭ ورنىندا كونە تاراز قالاسىنىڭ ارحەولوگيالىق قازبا جۇمىستارى باستالعان. جۇمىستاردى جەرگىلىكتى بيۋدجەت قارجىلاندىردى.
ارحەولوگتار VI-XII عاسىرلارعا جاتقىزىلاتىن شامامەن 40 مىڭ ارتەفاكت، ورتاعاسىرلىق قامال، VIII - IX عاسىرلارداعى مەشىت، زاراتۋستراشىلدىقتاردىڭ مەحرابى، تالاس وزەنى كونە اڭعارىنىڭ جاعالاۋىن، تۇرعىن قۇرىلىستارىنىڭ ىرگەتاستارىن انىقتاعان.
قازاق حاندىعىنىڭ 550 جىلدىعى سالتاناتتارىنىڭ ەڭ ءىرى نىسانى بولىپ تابىلاتىن كەشەن قۇرىلىسىنىڭ جالپى قۇنى 2,5 ملرد. تەڭگەنى قۇرايدى. «كونە تاراز» ساياباعى اۋماعىنىڭ 20 گەكتارىندا كىرەبەرىس اركاسى، باقىلاۋ مۇناراسى، دوستىق ءۇيى مەن كونگرەسس-حولدىڭ جانىنداعى ەتنومادەني ورتالىق، ەتنوگرافيالىق مۋزەي، «تاراز سازدارى» ستەلاسى، سونداي-اق «مىڭبۇلاق» ساياباعى ورنالاسقان.
ارحەولوگيالىق جۇمىستاردىڭ بارىسىمەن تانىساتىن قوناقتاردى قارسى الۋعا قازاقستان رەسپۋبليكاسىنىڭ مادەنيەت جانە سپورت ءمينيسترى ارىستانبەك مۇحامەديۇلى جانە وبلىس اكىمىنىڭ ورىنباسارى ەرقانات ءمانجۋوۆتىڭ قاتىسۋى كۇتىلىپ وتىر.
كەشەننىڭ اشىلۋ سالتاناتىنا قازاقستان رەسپۋبليكاسى سەناتى جانە ءماجىلىس دەپۋتاتتارى، مينيسترلەر مەن ۇلتتىق كومپانيالاردىڭ باسشىلارى، قوعامدىق قايراتكەرلەر، شىعارماشىلىق ينتەلليگەنتسيا جانە جوو-نىڭ وكىلدەرى، ارداگەرلەر، وبلىستىق ءماسليحات دەپۋتاتتارى شاقىرىلعان.
