اباي وبلىسىنىڭ جاڭادان تاعايىندالعان اكىمى بەرىك ءۋالي ءوڭىر باسشىسى رەتىندەگى العاشقى كەزدەسۋىن اقساقالدار جانە زيالى قاۋىم وكىلدەرىمەن وتكىزدى، دەپ حابارلايدى "ادىرنا" ۇلتتىق پورتالى اراشاعا سىلتەپ.
العاشقى باسقوسۋدا ايماقتىڭ الەۋمەتتىك-ەكونوميكالىق دامۋى، تاريحي جانە مادەني ورىندارىن دامىتۋ، سونداي-اق اۋىل شارۋاشىلىعى مەن ءتۋريزمدى وركەندەتۋ ماسەلەلەرى تالقىلاندى.
بەرىك ءۋالي ءوڭىر اقساقالدارىنىڭ ۇسىنىستارىن تىڭداپ، ولاردىڭ اقىل-كەڭەسىن جۇمىس بارىسىندا باسشىلىققا الاتىنىن اتاپ ءوتتى.
«اباي وبلىسىن قۇرۋ – تاريحي ادىلەتتىلىكتىڭ ورناۋى. ەندى ناقتى جۇمىس ىستەيتىن ۋاقىت كەلدى. ءوڭىردى دامىتۋعا بار كۇش-جىگەرىمدى سالامىن»، – دەدى وبلىس اكىمى.
ءوڭىر باسشىسى پرەزيدەنت تاپسىرماسىنا سايكەس ينۆەستيتسيالىق احۋالدى جاقسارتۋ، اۋىل شارۋاشىلىعى، كولىك-لوگيستيكا سالالارىن دامىتۋ، ەكونوميكانى ءارتاراپتاندىرۋ ماسەلەلەرىنە ەرەكشە نازار اۋداراتىنىن جەتكىزدى.
كەزدەسۋ بارىسىندا اقساقالدار اۋىل-ايماقتاردىڭ دامۋى، مادەنيەت پەن تۋريزم سالالارىنىڭ وركەندەۋى قاجەتتىگىن اتاپ ءوتتى.
«ەكونوميكانى جاقسارتىپ، الەۋمەتتىك ماسەلەلەردى شەشۋ ءۇشىن جاقسى بايلانىس قاجەت. بەرىك ءۋاليۇلى – تاجىريبەلى باسشى. مەملەكەتتىك قىزمەتتە مول تاجىريبە جينادى. ەندى ونىڭ اينالاسىنا توپتاسىپ، ءوڭىردىڭ وركەندەۋى ءۇشىن بىرگە جۇمىس ىستەۋىمىز كەرەك»، – دەدى اباي وبلىسى قوعامدىق كەڭەسىنىڭ توراعاسى مەيرامحات اينابەكوۆ.
كەزدەسۋ سوڭىندا ءوڭىردىڭ اقساقالى مولدابەك جانبولاتوۆ وبلىس اكىمىنە اق باتاسىن بەرىپ، ساتتىلىك تىلەدى.
«سەمەي – الاشتىڭ استاناسى، قازاق رۋحانياتىنىڭ تەمىرقازىعى. ءبىز بىرگە جۇمىس ىستەپ، ءوڭىردى دامىتۋ جولىندا ايانباي ەڭبەك ەتۋىمىز كەرەك»، – دەپ تۇيىندەدى بەرىك ءۋالي.
ۇقساس جاڭالىقتار
